Fransuz modalar uyi Balenciaga yana bir bor o‘zini futbol dunyosida sinab ko‘rishga qaror qildi. Brend bu safar Adidas bilan birgalikda yangi sport liboslari kolleksiyasini taqdim etdi. Liboslar namoyishi esa Nyu-York fond birjasi binosida bo‘lib o‘tdi.
Taqdim etilgan liboslar “Manchester Yunayted” formalarini eslatib yuboradi. Adidas’ning o‘tmishdagi ishlari ta’siri bu liboslarda ham saqlanib qolganiga guvoh bo‘lish mumkin.
Umuman olganda, dizaynerlar katta ehtimol bilan “Liverpul” 2008/10-yilgi mavsumlarda foydalangan liboslardan ilhomlangani ko‘rinadi. Uch chiziq va Adidas logotipi o‘z o‘rnida, Carlsberg (“Liverpul” homiysi) yozuvi o‘rnini esa Balenciaga egallagan.
Balenciaga’ning ushbu liboslar yaratilishida ishtiroki sabab ularning narxi yaxshigina ko‘tarilganini ko‘rish mumkin. Masalan, futbolkaning o‘zi uchun 995 dollar so‘ralmoqda. Butun kolleksiyani olishni istagan kishi esa 5500 dollarga pul to‘lashiga to‘g‘ri keladi. Kolleksiyadan esa sport kostyumi, kurtka, xudi, krossovka va boshqa aksessuarlar o‘rin olgan.
Balenciaga futbol dunyosiga birinchi marta 2020-yil martida “bosh suqib ko‘rgan”. Parijdagi modalar haftaligi vaqtida brend AW20 kolleksiyasini taqdim etgan.
“Bolaligim Gruziyada futbolchilar va ruhoniylar orasida o‘tgandi”, — deya brendning kolleksiyasini izohlagandi o‘sha vaqtdagi ijodiy g‘oyalar bo‘yicha direktor Demna Gvasaliya.
Kolleksiya to‘rtta to‘liq — qizil, to‘qko‘k, qora va sariq rangli komplektdan iborat edi. Xayoliy futbol klubi libosidan brend logotipi va Balenciga yozuvi o‘rin olgandi. Liboslardan biri esa uzun yengli qilib ishlangandi.
Balenciaga — bu modalar uyi bo‘lib, unga 1919-yilda ispan dizayneri Kristobal Balensiaga tomonidan asos solingan. Uning mijozlari orasida Ispaniya qirollik oilasi hamda arikstokratlar bo‘lgan. Balensiaga 1937-yil, Ispaniyadagi fuqarolik urushi vaqtida, Parijga ko‘chib o‘tgan. Ayni damda brend fransuz kompaniyasi Kering’ga tegishli.
Izoh (0)