Kiyevning “Dinamo” klubi va O‘zbekiston terma jamoasi sobiq hujumchisi Maksim Shatskix “Paxtakor” klubida sport direktorligi lavozimida ish boshladi. Bu haqda “sherlar” matbuot xizmati ma’lum qildi.
“Sherlar” 43 yoshli mutaxassis bilan shartnoma imzolagan. Uning tafsilotlari ochiqlanmagan.
Bunga qadar ushbu lavozimda Ja’far Irismetov faoliyat yuritardi.
“Paxtakor” tarbiyalanuvchisi hisoblangan Shatskix futbolchilik faoliyatini O‘zbekistondan tashqarida o‘tkazgan. U “Dinamo Kiyev” (1999—2009), “Arsenal Kiyev” (2010—2012, 2013) va boshqa qator klublarda to‘p surgan. 1999—2014-yillar mobaynida O‘zbekiston milliy terma jamoasida harakat qilgan.
2016-yilda butsilarini mixga ilgan Shatskix “Dinamo Kiyev”da murabbiy yordamchisi sifatida ish boshladi. 2019-yilda Rossiyaning “Rotor” klubi bosh murabbiyiga assistent bo‘ldi va 2021-yildan u yerdan ketganidan beri ishsiz yurgandi.
Izoh (0)