Ijtimoiy tarmoqlarda Toshkent shahrining Sergeli tumanida joylashgan uylarning biri yonayotgani tasvirlangan video tarqaldi. FVV holat yuzasidan ma’lumot berdi.
Ma’lum qilinishicha, 31-may kuni soat 23:20 da Sergeli tumani “Belariq” MFY Uzumzor ko‘chasida joylashgan uylarning birida yong‘in sodir bo‘layotgani to‘g‘risida shahar FVBga xabar kelib tushgan. Shunga ko‘ra 5 ta yong‘in-qutqaruv ekipaji voqea joyiga soat 23:27 da yetib borib, yong‘in soat 23:39 da qurshab olingan va soat 23:44 da bartaraf etilgan.
Yong‘in natijasida xonadonning taxminan 200 kvadrat metr maydonda tom qismi yonib zararlangan. Hodisa oqibatida tan jarohati olgan va halok bo‘lganlar yo‘q.
Voqea joyiga shahar FVB rahbariyati va tuman FV bo‘limi rahbar xodimlari yetib borgan. Hozirda yong‘in sababi hamda keltirilgan moddiy zarar miqdori aniqlanmoqda.
Avvalroq Toshkentda sexda yuzaga kelgan yong‘in o‘chirilgani, Samarqandda bir-biriga tutashgan beshta uyda yong‘in sodir bo‘lgani, Sirdaryoda masjid hovlisida yong‘in yuzaga kelgani to‘g‘risida xabar berilgandi.
Izoh (0)