Rasman: Roman Abramovich “Chelsi”ni amerikalik investorlarga sotib yubordi

“Chelsi”ning boshqaruvi boshqa xo‘jayin qo‘liga o‘tdi. Bu haqida jamoa rasmiy sayti ma’lum qildi.

Roman Abramovich tomonidan klubni amerikalik milliarder Todd Boeli va Clearlake Capital konsorsiumiga sotish ishlari yakunlandi. Kelishuv 4,25 milliard funtga baholangani xabar qilinmoqda.

Avvalroq ushbu kelishuvni Buyuk Britaniya hukumati, APL va boshqa rasmiy shaxslar ma’qullagan edi.

Klub boshqaruvi Boeli va Clearlake o‘rtasida teng taqsimlanadi. Shuningdek, Todd boshqaruv kompaniyasining raisi etib tayinlanadi.

Eslatib o‘tamiz, 27-fevral kuni Abramovich Ukrainadagi vaziyat tufayli “Chelsi” boshqaruvini klub xayriya fondiga topshirdi. 3-mart kuni esa 2003-yildan beri boshqarib kelayotgan jamoasini sotishga qaror qilganini ma’lum qildi.

Abramovichga nisbatan qo‘llangan sanksiyalar tufayli “Chelsi” o‘y o‘yinlarga chipta sotish huquqidan mahrum qilindi (biroz muddatdan keyin Buyuk Britaniya hukumati “Chelsi”ga uy o‘yinlariga chipta sotishga ruxsat berdi). Shundan so‘ng klubning bosh homiysi jamoa bilan hamkorlikni to‘xtatdi. Bundan tashqari, “Chelsi”ning bank hisoblari ham muzlatildi. Keyinchalik klub Buyuk Britaniya hukumatini joriy cheklovlar ostida mavsumni yakunlay olmasligi mumkinligi haqida ogohlantirdi.