Toshkentning Mirobod tumanida yo‘l ta’mirlash ishlari sabab bir necha ko‘chalarda avtotransport harakati qisman cheklanishi haqida xabar berilgan edi. “Daryo” so‘roviga asosan poytaxt hokimligi axborot xizmati ta’mirlash ishlari qachongacha davom etishini ma’lum qildi.
Rejaga ko‘ra, quyidagi hududlarda ta’mirlash ishlari olib boriladi:- Mehrjon va Kichik xalqa yo‘li kesishmasi;
- Kichik halqa yo‘li va Avliyo ota ko‘chalari kesishmasi;
- Temiryo‘lchilar va Sariko‘l ko‘chalari kesishmasi;
- Mehrjon va Sariko‘l ko‘chalari kesishmasi;
- Oybek va Kichik halqa yo‘li ko‘chalari kesishmasi;
- Turkiston va Kichik halqa yo‘li kesishmasi.
Ish jarayonida yo‘llar yopilmasdan, avtotransport harakati qisman cheklanmoqda. Shu sababli ayrim paytlarda yo‘llarda tirbandliklar yuzaga kelmoqda.
Toshkent shahar hokimligi axborot xizmatining ma’lum qilishicha, qurilish-ta’mirlash ishlarini yakunlash uchun 10 kun muddat belgilangan.
“Ushbu yo‘l qismi shahar hokimligi tomonidan tashkil etilgan ‘Xalq fikri’ guruhiga aholidan kelib tushgan takliflar asosan ta’mirlanmoqda. Qurilish ishlarini 10 kun ichida yakunlash belgilangan bo‘lsa, quruvchilar 5-6 kun muddatda tugallashni rejalashtirmoqda. Ish uzluksiz kun-u tun olib borilmoqda”, — dedi hokimlik mas’ul xodimi.
Izoh (0)