Samarqandda otasiga tegishli Lacetti’ni boshqargan 8-sinf o‘quvchisi ikki kishini urib yubordi. Jabrlanuvchilardan biri vafot etgan

Samarqandda otasiga tegishli mashinani boshqargan 8-sinf o‘quvchisi YTH sodir etib, ikki fuqaroni urib yubordi. Bu haqda Samarqand viloyati IIB axborot xizmati xabar berdi.

Ish hujjatlariga ko‘ra, o‘quvchi yigit otasiga tegishli mashinani yuvgan va uni haydab ko‘chaga chiqqan. 19-may kuni soat 22:00 larda “Beshqo‘ton” mahallasining ichki yo‘lida harakatlanib ketayotgan Lacetti avtomashinasi ichida bo‘lgan yigitcha boshqaruvni yo‘qotgan va ikki nafar fuqaroni urib yuborgan. So‘ng avtomobil Cobalt mashinasiga urilib, to‘xtagan.

YTH oqibatida 64 yoshli fuqaro olgan tan jarohatlari oqibatida voqea joyida vafot etgan, ikkinchi fuqaro esa turli tan jarohatlari bilan tibbiyot birlashmasiga yotqizilgan.

Holat yuzasidan Bulung‘ur tumani IIB huzuridagi Tergov bo‘limi tomonidan Jinoyat kodeksining 266-moddasi (transport vositalari harakati yoki ulardan foydalanish xavfsizligi qoidalarini buzish) 2-qismi bilan jinoyat ishi qo‘zg‘atilib, dastlabki tergov harakatlari olib borilmoqda.

Avvalroq Namanganda 14 yoshli bola “Jiguli”da tengdoshini bosib ketib, uning o‘limiga sababchi bo‘lgani, Samarqandda Cobalt 16 yoshli piyodani urib, uchirib yuborgani to‘g‘risida xabar berilgandi.