“Korrupsiyaga oid jinoyat sodir etgan shaxslar davlat xizmatiga olinmaydi” — Senat “Davlat fuqarolik xizmati to‘g‘risida”gi qonunni ma’qulladi

Bugun, 28-may kuni Oliy Majlis Senati tomonidan “Davlat fuqarolik xizmati to‘g‘risida”gi qonun ma’qullandi. Bu haqda “Daryo” muxbiri xabar bermoqda.

Majlisda Senat qo‘mitasi raisi Narimon Umarov so‘zga chiqib, qonun haqida gapirdi.

“Bu qonun davlat fuqarolik xizmatiga nomzodlarni ochiq, mustaqil tanlov orqali saralab olish jarayonini kompleks huquqiy tartibga solishni ta’minaydi. Shuningdek, davlat fuqarolik xizmatchilarini ish samaradorligini baholovchi mezonlarni, ularning malakasini oshirishga bo‘lgan talablarni belgilovchi, to‘g‘ridan to‘g‘ri ta’sir kuchiga ega qonun hisoblanadi”, – dedi senator.

Ma’lum qilinishicha, qonunda davlat fuqarolik xizmatchisi o‘zaro yaqin qarindoshlikda yoki quda tomondan qarindosh bo‘lgan shaxslarning aynan bitta davlat organi va tashkilotida birga xizmat qilishi mumkin emasligi nazarda tutilgan.

Hujjat bilan davlat fuqarolik xizmati sohasida korrupsiyaga oid huquqbuzarliklarning oldini olishning huquqiy asoslari yaratilmoqda, ya’ni davlat xizmatchilarining faoliyati eng muhim samaradorlik ko‘rsatkichlari (KPI) asosida baholanishi qat’iy belgilanmoqda. Korrupsiyaga oid jinoyatlarni sodir etgan shaxslar davlat fuqarolik xizmatiga qabul qilinmaydi.

Shu bilan birga, ilmiy va ijodiy faoliyatdan tashqari haq to‘lanadigan boshqa faoliyat bilan, shuningdek tadbirkorlik faoliyati bilan shug‘ullanishga yo‘l qo‘yilmasligi, korrupsiyaga oid jinoyatlarni sodir etgan shaxslar davlat fuqarolik xizmatiga qabul qilinmasligi nazarda tutilmoqda.

Qonunga yana bir qator muhim normalar:

• korrupsiya xavfi yuqori bo‘lgan lavozimlarni egallab typgan davlat fuqarolik xizmatchilarining majburiy rotatsiya qilinishi;
• xizmat vakolatlarini boshqa shaxslarning manfaatlarini ko‘zlab bajarish yoki bajarmaslik evaziga ulardan biron-bir mukofot, foyda yoki sovg‘alar olish qat’iy ta’qiqlanishi;
• o‘z daromadlari hamda mol-mulki to‘g‘risida deklaratsiya taqdim etishi shartligi;
• O‘zbekiston hududidan tashqarida hisobvaraqlar ochishga va ularga ega bo‘lishga, chet elda ko‘chmas mulkka va boshqa mol-mulkka egalik qilishga haqli emasligi;
• odob-ahloq qoidalariga rioya etish shartligi;
• davlat organining nufuzini tushirishga olib kelishi mumkin bo‘lgan harakatlardan tiyilishi;
• o‘z xizmat mavqeidan shaxsiy maqsadlarda foydalanmasligi;
• davlat mulkidan faqat xizmat maqsadlarida foydalanishi shartligi kiritilmoqda.