Ijtimoiy tarmoqlarda Andijon viloyatining Oltinko‘l tumanida yashovchi ayol 11 yoshli o‘gay qiziga turli tan jarohatlari yetkazib kelgani aytilgan video tarqaldi. Viloyat IIBning ma’lum qilishicha, holat ishchi guruh tomonidan o‘rganib chiqilgan.
Aniqlanishicha, tumanning “Ganjiravon” MFYda yashovchi 11 yoshli I.H.ga nisbatan 22-may kuni o‘gay onasi X.M tomonidan tan jarohati yetkazilgan. Shu kuni voyaga yetmagan I.H. bobosi hamda buvisi istiqomat qilayotgan uyga qochib kelgan. Qiz ularga bo‘lgan voqeani aytib bergan va shu mahallada yashovchi (vafot etgan onasining ota-onasi) buvisining yashash xonadoniga olib borib qo‘yishlarini iltimos qilgan.
Mazkur xonadonga borgandan so‘ng, I.H.ning xolasi jiyaniga yetkazilgan tan jarohatlarni videotasvirga olib, ijtimoiy tarmoqlarga joylagan.
27-may kuni voyaga yetmagan I.H.dagi tan jarohatlarining og‘irlik darajasini aniqlash uchun sud-tibbiy ekspertizasi tayinlangan. Hozirda mazkur holat yuzasidan Oltinko‘l tumani IIB tomonidan tergovga qadar tekshiruv harakatlari olib borilmoqda.
Avvalroq Samarqandda 9 oylik o‘gay qizini o‘ldirgan erkak 13 yilga qamalgani to‘g‘risida xabar berilgandi.
Izoh (0)