Rossiyaning Krasnodar o‘lkasida ishlayotgan O‘zbekiston fuqarolari vatanga qaytarildi, deb xabar beradi Tashqi mehnat migratsiyasi agentligi.
Ma’lum qilinishicha, agentlikning Krasnodardagi vakiliga asli samarqandlik bo‘lgan D.M. va U.Z.dan hujjat va oylik maoshlari berilmayotgani yuzasidan murojaat kelib tushgan.
Murojaat o‘rganilganda fuqarolar 2022-yil fevral oyida Krasnodar o‘lkasiga kelib mavsumiy qishloq xo‘jaligi ishlarida mehnat faoliyatini amalga oshirgani va ish beruvchi tomonidan hujjatlari olib qo‘yilgani ma’lum bo‘lgan.
Vakillik xodimlari tomonidan ish beruvchi bilan muzokaralar olib borilgandan so‘ng, O‘zbekiston fuqarolarining hujjatlari va oylik maoshlari undirib berilgan hamda ular vatanga qaytarilgan.
Avvalroq Moskva viloyatida sodir bo‘lgan yong‘in oqibatida ikki nafar O‘zbekiston fuqarosi halok bo‘lgani, Rossiyada ish beruvchi tomonidan pasportlari olib qo‘yilgan o‘zbekistonliklarning hujjatlari qaytarilgani, Novosibirskda voyaga yetmagan farzandi bilan qiyin ahvolda qolgan o‘zbekistonlik ayol vatanga olib kelingani xabar qilingandi.
Izoh (0)