Bir filmda ikkita qahramonni mahorat bilan ijro etgan o‘zbekistonlik aktyor va aktrisalar (video)

Xorij filmlarida egizaklar yoki qiyofadosh insonlar rolini ijro etgan aktyorlar ko‘p. Odatda bunday rollar aktyordan katta mahorat va sabrni talab etadi. Chunki bir vaqtning o‘zida ikki xil xarakterni jonlantirish oson emas. O‘zbek filmlarida ham bunday ishni uddalay olgan aktyorlar bor. Quyida ana shunday filmlar haqida so‘z boradi.

Yodgor Sa’diyev — “Shaytanat”

O‘zbekiston xalq artisti Yodgor Sa’diyev “Shaytanat” serialida ikkita qahramon rolini ijro etgan. Ammo ko‘pchilik tomoshabinlar buni payqashmagan. Ya’ni u Asadbek rolidan tashqari, sobiq tuzum davrida quloq qilingan otasining qiyofasini ham ijro etgan. Mazkur sahnada hammasi a’lo, faqatgina qor o‘rnida sovunli ko‘pikdan foydalanishgani biroz ishonarsiz chiqqan, xolos.

Adiz Rajabov — “O‘zimdan o‘zimgacha”

2009-yili rejissor Abduvohid G‘aniyev “O‘zimdan o‘zimgacha” nomli filmni suratga olgan. Mazkur filmda Davron va Narimon ismli personajlar bor. Mazkur personajlar qiyofadosh bo‘lgani bois rolni bir aktyor — Adiz Rajabov ijro etgan. Ota-onasining qistovi sabab uylangan Davron to‘yi kuni uyidan qochib ketadi. U chekka qishloqqa yetganida ehtiyotsizligi sabab cho‘pon Narimonni urib yuboradi. U qonga belangan qiyofadoshini ko‘rib, qo‘rqib ketadi va mashinasini tashlab qochadi. Cho‘ponni qimmatbaho mashinaning yonida ko‘rganlar uni Davron deb o‘ylab, oila a’zolariga qo‘ng‘iroq qilishadi. Shu voqeadan so‘ng Narimon shaharga, badavlat oila a’zolari davrasiga ketadi. Davron esa qishloqda qolib cho‘ponlik qiladi. Film yakunida Davronga unashtirilgan qiz Narimonni sevib qoladi. Qishloqdagi qiz esa shaharlik Davronga ko‘ngil qo‘yadi.

Gulchehra Eshonqulova — “Jonim seni yoxud egizaklar”

2004-yili rejissor Burhon Sharopov “Jonim seni yoxud egizaklar” nomli filmni suratga olgan. Mazkur kartinada aktrisa Gulchehra Eshonqulova taqdir sinovlari sabab uzoq yillar bir-biridan ayro yashagan egizak opa-singillar rolini ijro etgan. Laylo qishloqning sodda qizi bo‘lib, u dugonalari singari pardoz-andoz qilishni yoqtirmaydi. Egizagi Zahro esa badavlat oila bag‘rida ulg‘aygan qiz bo‘ladi. Film so‘nggida egizaklar bir-biri bilan uchrashadi va onalarini izlashadi.

Sharof Muqimov — “Niqob”

2007-yili rejissor Burhon Sharopov “Niqob” nomli filmni suratga olgan. Mazkur filmda Sharof Muqimov Hasan va Husan rolini ijro etgan. Hasan jahldor boshliq, Husan esa hazilkash va samimiy rassom bo‘ladi. Husan akasining ishxonasiga borib, uning qo‘l ostida ishlaydigan Zarifa ismli qizni yoqtirib qoladi. Hasan esa mazkur xodimasi bilan ko‘p marta kelishmovchilikka borgan bo‘ladi. Zarifa boshlig‘ining o‘zgaruvchan muomalasidan ajablanadi.  Aka-ukaning o‘xshash tashqi qiyofasi sabab ko‘plab qiziqarli voqealar sodir bo‘ladi.

Nafisa Ortiqova — “Tutash taqdirlar”

2009-yili ekran yuzini ko‘rgan “Tutash taqdirlar” serialida raqqosa qiz Ra’no rolini ijro etgan Nafisa Ortiqova ham ikkita qahramon qiyofasini gavdalantirgan. Afsuski, buni ko‘pchilik tomoshabinlar payqamaydi. Ya’ni u Ra’nodan tashqari, ancha yil avval olamdan o‘tgan  onasi rolini ham ijro etgan. U xonasida marhuma onasi va otasining suratiga termilib, u bilan dardlashadi. Ya’ni rejissor vaziyatdan chiqishning oson yo‘lini tanlab, marhuma ona roli bilan bog‘liq detalda uning o‘zidan foydalangan.

Alisher Uzoqov — “O‘xshatmasdan uchratmas”

Rejissor Javlon Shodmonov 2011-yili “O‘xshatmasdan uchratmas” nomli filmni suratga olgan. Unda Alisher Uzoqov ba’zi sabablarga ko‘ra bolaligidan ayro yashagan egizaklar rolini ijro etgan. Aziz va Farhod ulg‘aygach, tasodif sabab uchrashib qolishadi. Yigitlarning ikkisida ham sevgan qizlari bilan bog‘liq qiziqarli voqealar sodir bo‘ladi. Ya’ni Farhod va Azizning o‘xshash qiyofasi sabab ular adashib ketadi. Film yakunida ular oila bo‘lib birlashadi va sevgan qizlariga uylanadi.

Muhammadiso Abdulxayirov — “Hasan ibn Husan”

2013-yili Javlon Shodmonov “Hasan ibn Husan” nomli filmni suratga olgan. Mazkur kartinada Muhammadiso Abdulxayirov ota va o‘g‘il rollarini ijro etgan. Filmda Shokirjon ismli tadbirkor kimyogar qo‘shnisidan sun’iy ravishda shokoladlarni kattalashtirib  berishini iltimos qiladi. Ixtirochi qo‘shnisining iltimosini inobatga olib, hajmi katta shokoladlarni yaratadi. Afsuski, uyiga Shokirjonning o‘g‘li Tursunboy chiqib, ixtiro qilingan shokoladni tatib ko‘radi. Tongda bolakay kattalashib, dadasining qiyofasida uyg‘onadi. Shu voqeadan keyin bir qiyofadagi ota va o‘g‘ilning sarguzashtlari boshlanadi.

Zarina Nizomiddinova — “Yurak yig‘lar”

Rejissor Akmal Shohnazarovning “Yurak yig‘lar” deb nomlangan filmi 2014-yilda suratga olingan. Ushbu filmda Zarina Nizomiddinova ikkita obrazni gavdalantirgan. Film sujetiga ko‘ra, bosh qahramon nogiron ekanligini bilib, sevgilisi Afro‘zadan uzoqlashishga harakat qiladi. Keyinchalik go‘zal Afro‘zaning hayotida Ali ismli yigit paydo bo‘ladi. Ammo sevgidan kuygan qiz uning sevgisini qabul qilmaydi. Ali buning sababini bilish uchun Afro‘zaning sobiq sevgan yigiti bilan uchrashadi. U og‘ir xastaligi sabab qizdan yiroqlashganini, ammo uni hali ham sevishini aytadi. Ali shundan so‘ng yigitni Afro‘za bilan uchrashtiradi va o‘zi shahardan ketishga qaror qiladi. Mehmonxonada qo‘shni xonadagi shovqindan bezovta bo‘lib, eshikni taqillatadi. Eshikni xorijlik qiz ochadi va u Afro‘zaga juda o‘xshash bo‘ladi. Aktrisa Zarina Nizomiddinova ikki rolni mohirlik bilan ijro etgan.

“Zamonaviy sovchilar-3”

O‘zbekistonda xizmat ko‘rsatgan artist Muhammadiso Abdulxayirov yana bir filmda qiyofadosh insonlar rolini ijro etgan. Ya’ni u “Zamonaviy sovchilar-3” komediyasida bir-biriga o‘xshash Sobir va Shavkatboy rollarini ijro etgan. Shavkatboyning o‘g‘li qo‘shnisi Sobirjon akaning uyiga chiqib, maktabida bir muammo chiqqanini va buni dadasiga aytishga qo‘rqayotgani uchun Sobirjon akadan dadasi rolini o‘ynab berishni so‘raydi. “Bittagina mo‘ylov yopishtirsangiz, dadamning o‘zginasi bo‘lasiz”, deydi. Birgina o‘zgarish sabab odamlar Sobirjonni Shavkatboy deb o‘ylaydi. Kamtarona hayot kechiradigan Sobirjonni Shavkatboy deb o‘ylab, odamlar qarzlarini to‘laydi. Afsuski, u boyning katta mablag‘ini yo‘qotib qo‘yib, boshi baloga qoladi.