O‘zbekistonda “1hls” platformasida kuniga 10 ming qadam yurganlarga 3 ming so‘mdan berish to‘xtatilgani ma’lum bo‘ldi. Fuqarolarni moddiy rag‘batlantirishga oid farmon bandi prezidentning 2022-yilning 6-apreldagi “O‘zbekiston respublikasi prezidentining ayrim hujjatlariga o‘zgartirish va qo‘shimchalar kiritish to‘g‘risida”gi farmoni bilan bekor qilingan.
2020-yil 30-oktabr kuni prezident Shavkat Mirziyoyevning “Sog‘lom turmush tarzini hayotga keng tatbiq etish va ommaviy sportni yanada rivojlantirish chora-tadbirlari to‘g‘risida”gi farmoni qabul qilingandi.
Unga muvofiq, aholi orasida kunlik yurish va yugurishni ommalashtirish maqsadida “Sog‘lom turmush tarzi” — “1hls.uz” platformasi yaratilishi va 2021-yilning 1-mart sanasidan boshlab ishga tushirilishi belgilangandi. Biroq platforma 2021-yilning iyun oyida test rejimida amaliyotga tatbiq etilgan. 2022-yil 16-yanvardan boshlab esa 3 ming so‘m pul mablag‘ berish tizimi to‘xtatilgan. O‘shanda, mutaxassislar va jamoatchilik takliflariga asosan, aholini yanada ko‘proq kunlik yurish va yugurishga jalb qilish maqsadida rag‘batlantirish tizimini o‘zgartirish, 3 ming so‘m o‘rniga kattaroq sovrinlar qo‘yish maqsadga muvofiq, degan xulosaga kelingandi. Shunga ko‘ra, “1hls.uz” platformasi orqali qator o‘zgarishlar amalga oshirilishi aytilgan edi.
2022-yilning yanvar oxirlarida “Yurak-qon tomir kasalliklarining oldini olish va davolash sifatini oshirish chora-tadbirlari to‘g‘risida” prezident qarori qabul qilingan va “Sog‘lom turmush tarzi” platformasidan foydalanuvchilarni rag‘batlantirish, ularning sonini yanada oshirish hamda bu borada olib borilayotgan ishlar ko‘lamini yanada kengaytirish maqsadida davlat budjetidan 100 milliard so‘m ajratilishi belgilangandi.
Aprel oyidagi prezident farmoni bilan “Sog‘lom turmush tarzini keng tatbiq etish va ommaviy sportni yanada rivojlantirish chora-tadbirlari to‘g‘risida”gi farmondan quyidagi 4-band olib tashlangan:
Jismoniy tarbiya va sport vazirligi, Axborot texnologiyalari va kommunikatsiyalarini rivojlantirish vazirligi, Adliya vazirligi, Sog‘liqni saqlash vazirligi va Moliya vazirligining aholini kunlik yurish va yugurishga targ‘ib qilish maqsadida “Sog‘lom turmush tarzi” (“1hls.uz”) platformasini yaratish to‘g‘risidagi taklifiga rozilik berilsin. Bunda:
O‘zbekiston hududida bir sutka davomida o‘n ming va undan ortiq qadam yurgan 18 va undan yuqori yoshdagi O‘zbekiston Respublikasi fuqarosining platformadagi elektron hamyoniga 3 ming so‘mdan;
har oyda har bir tuman (shahar) bo‘yicha eng ko‘p yurgan shaxsga 300 ming so‘mdan, har bir hudud bo‘yicha eng ko‘p yurgan shaxsga 500 ming so‘m, respublika bo‘yicha eng ko‘p yurgan shaxsga 1 million so‘m qo‘shimcha ravishda platformadagi elektron hamyoniga o‘tkaziladi.
“Birinchisi, budjetda pul yetmay qolgan. Ammo bu ishonchsiz variant. Sportga trillionlab pul sarflanayotgan bir paytda piyoda yuradigan aholiga berish uchun yiliga taxminan 100 mlrd so‘m pul topilmasligi uyat.
Ikkinchisi, yangi tashkil etilgan Sportni rivojlantirish vazirligi rahbariyati bunaqa tizim uchun boshini qotirib, o‘zini qiynagisi kelmagan va tinchgina uni butunlay bekor qilib qo‘ya qolishni afzal bilgan. Bu variant birinchisidan ham uyatliroq. Chunki piyoda yurganlarga pul berish tashabbusi shaxsan Shavkat Mirziyoyevga tegishli edi. Prezident bir necha bor yig‘ilishlarda ushbu tizim boshqa davlatlarda yo‘qligi, tizim o‘zini oqlayotgani, aholini shu orqali piyoda yurishga o‘rgatib, salomatlik bilan bog‘liq ko‘plab muammolarga yechim topish mumkinligini ta’kidlagandi”, — deb yozadi u.
Izoh (0)