O‘zbekiston Jahon savdo tashkilotiga (JST) a’zo bo‘lish harakatida, Yevrosiyo iqtisodiy ittifoqiga (YOII) kirish masalasida esa o‘rganish o‘tkazmoqda. Bu haqda Senat raisining birinchi o‘rinbosari Sodiq Safoyev jurnalistlarga bergan intervyusida aytib o‘tdi, deya xabar bermoqda “Daryo” muxbiri.
Sodiq Safoyevning ta’kidlashicha, JSTga kirish mamlakat milliy va iqtisodiy manfaatlari himoyasi uchun muhim vosita hisoblanadi.
“Biz O‘zbekiston uchun JST qanchalik muhimligini tushunamiz. Kecha Jahon iqtisodiyoti va diplomatiya universitetida JST kafedrasini ochdik. Uning asosiy maqsadi — ilmiy tadqiqotlar olib borish, ya’ni qanday qilib JSTga kirish jarayonlarini yengillashtirishimiz mumkinligini o‘rganish. Ishonamanki, O‘zbekiston JSTga kirish jarayonini jadallashtirishi kerak. Bu haqda davlat rahbarining tegishli ko‘rsatmalari ham bor. Bu tashkilot ichida O‘zbekiston manfaatlarini himoya qilish uchun mexanizmlar mavjud. U bizga imkoniyatlarni ochadi. Albatta, imkoniyat ochishi bilan birga, alohida bir sektor yoki tarmoqlarimizga qandaydir muammolarni ham tug‘dirishi mumkin. Lekin umuman olganda, shu tashkilotga kirmagan sanoqli davlatlar qoldi. Va bizning u yerda bo‘lmasligimiz, o‘zimizning iqtisodiy, milliy manfaatlarimizni himoya qilish uchun vositalardan foydalanmayotganimizni bildiradi. JSTga kirish bizning oldimizda turgan muhim masalalardan biri”, — dedi Senat rasmiysi.
Shuningdek, Sodiq Safoyev O‘zbekiston YeOIIga a’zo bo‘lish borasida o‘rganish o‘tkazayotganini aytdi.
“Yevrosiyo iqtisodiy ittifoqiga qo‘shilish masalasida o‘rganish jarayoni davom etmoqda. Hammamiz anglaymiz, bu yerda murakkab jarayonlar amalga oshmoqda. Biz o‘rganib boryapmiz. Buning uchun masalaning ichiga kirib, bilim evaziga natijaga erishishimiz mumkin”, — dedi yuqori palata vakili.
Avvalroq Sodiq Safoyev yirik islohotlarni amalga oshirish uchun Konstitutsiyani o‘zgartirish kerakligini ta’kidlagandi.
“Masalan, hamma aytadigan masala — investitsiyalar, iqtisodiyotimizning rivojlanishi yer islohoti bilan bog‘liq. Ammo amaldagi Konstitutsiya bunga to‘siq bo‘lib turibdi. Xususiy mulk, inson huquqlarini kafolatlash kabi masalalarning barchasi konstitutsion o‘zgarishlarni talab qiladi”, — degan edi Senat raisi o‘rinbosari.
Izoh (0)