Farg‘ona viloyati davlat soliq boshqarmasi tomonidan Majburiy ijro byurosi viloyat boshqarmasi bilan hamkorlikda viloyatning barcha shahar va tumanlarida soliq qarzdorliklarini undirish uchun xatlov tadbirlari olib borilmoqda.
Hozirga qadar o‘tkazilgan tadbirlar natijasida 39 ta tadbirkorlik subyekti 2,9 milliard so‘m miqdoridagi soliq to‘lovlarni amalga oshirdi.
Shuningdek, qarzdorligi katta bo‘lgan 50 ta subyektning qariyb 30 milliard so‘m qiymatdagi mol-mulki xatlovga olindi.
Misol uchun, Qo‘qon shahrida o‘tkazilgan xatlovda “Qo‘qon neft-gaz parmalash ishlari” AJning 4,2 milliard so‘m soliq qarzi hisobiga jamiyatning Lacetti va Nexia xizmat avtomashinalari jarima maydoniga olib kirilib xatlandi (xatlovning dastlabki kunida qarzdorning “KamAZ” va yana bir Nexia rusumli mashinasi ham xatlovga olingandi).
Shuningdek, tadbirlarda “Qo‘qon paxta tozalash” AJning 592 million so‘m soliq qarzdorligi uchun jamiyatning ma‘muriy binosi hamda Damas transport vositasi xatlandi.
Qo‘qon shahrida ro‘yxatdan o‘tgan yana bir korxona “Qo‘qon poyabzali” MCHJning esa 184,3 million so‘m soliq qarzi evaziga taxminiy qiymati 100 million so‘m bo‘lgan Lacetti avtomashinasi xatlanib jarima maydoniga qo‘yildi.
Bundan tashqari, Bag‘dod tumanidagi “Bag‘dod TYFUK”ning 977 million so‘m soliq qarzdorligini undirish jarayonida korxonaga tegishli bino inshootlar xatlandi.
Furqat tumani o‘tkazilgan xatlovlarda esa “Sifat qurilish biznes” MCHJning soliqlardan bo‘lgan 240 million so‘m qarzdorligi uchun Howo rusumli yuk transport vositasi xatlanib, jarima maydoniga joylashtirildi.
Izoh (0)