Kilian Mbappe “PSJ”da qoladi va “Real”ning taklifini rad etadi.
Bu haqda jahon futbolining eng ishonchli insayderlaridan biri Fabrisio Romano xabar berdi. Romanoga ko‘ra, Mbappe Parijda qoladi va bu yozda “Real”ga o‘tmaydi. Futbolchi yakuniy qarorini “Real” prezidenti Florentino Peresga ma’lum qilgan.
Shuningdek, Sky Sport jurnalisti Janluka di Marsio ham 23 yoshli fransiyalik hujumchining parijliklar bilan shartnomasini uzaytirishga qaror qilgani haqida ma’lumot tarqatdi.
Yagona yetishmayotgan narsa — rasmiy ma’lumot, 21-may kuni Liga 1 ning 38-turi doirasidagi “Mets”ga qarshi o‘yindan so‘ng e’lon qilinishi mumkin.
Mbappening uzoq vaqt ilgari og‘zaki kelishuvga erishgan “Real”ga rad javobini berishida nafaqat moliyaviy manfaatlar, balki uning oila a’zolari va hujumchining “Monako”dan “PSJ”ga o‘tishida ishtirok etgan nufuzli shaxslarning ham o‘rni borligi aytilmoqda.
RMC Sport ham Mbappe jamoasini o‘zgartirmaslikka qaror qilganini tasdiqlamoqda. Parijliklar bilan yangi shartnoma bo‘yicha muzokaralar yaxshi ketayotgani aytildi.
Mbappening parijliklar bilan shartnomasi 2021/22-yilgi mavsum oxirigacha mo‘ljallangan.
Hozircha futbolchi ham, “PSJ” ham transfer borasida rasmiy ma’lumot bergani yo‘q. 20-may kuni Floretino Peres “Real” futbolchilariga Mbappe bilan shartnoma imzolanmasligini aytgani, “PSJ” Kilianga kelishuvni uzaytirgani uchun 300 mln yevro bonus va yiliga 100 mln yevro maosh (soliqlardan keyin) taklif qilayotgani haqida xabarlar tarqalgandi. Futbolchining onasi esa quyidagicha bayonot bergandi: “Real” va “PSJ” bilan kelishuvimiz bor, takliflar teng. Faqat Kilian ulardan birini tanlashi kerak”. Ungacha futbolchi o‘z qarorini 22-may kuni tushdan keyin TF1 kanali efirida e’lon qilishi aytilgandi.
Izoh (0)