19-may kuni Toshkentdagi Inno texnoparkda start olgan “Mirzo Ulug‘bek vorislari” respublika tanlovining so‘nggi bosqichi o‘z nihoyasiga yetdi.
3 kun davom etgan musobaqada respublikaning turli hududlaridan tashrif buyurgan 280 nafar iqtidorli yoshlar mini texnologiyalarga asoslangan innovatsion ishlab chiqarish, robototexnika, innovatsion xizmatlar, dasturlash, VR va AR, qishloq xo‘jaligi va biotexnologiya, muqobil energiya, sog‘liqni saqlash, sun’iy intellekt, 3D prototiplash kabi yo‘nalishlar bo‘yicha o‘z g‘oya va ishlanmalarini maxsus komissiyaga taqdim etishdi.
Ko‘rik-tanlov ishtirokchilari ilgari surgan startaplarning aksariyati bugun ham dolzarb ekani, xilma-xilligi, eng muhimi, ularning maktab o‘quvchilari va talabalar tomonidan yaratilganligi tanlov hay’at a’zolari uchun ham kutilmagan bo‘ldi deyish mumkin. Jumladan, tanlovning final bosqichiga kelgan jamoalardan biri robot-kulerni taqdim qildi. Robot suv ichish uchun oldiga kelgan odam bilan gaplasha oladi, shuningdek, u bilan turli mavzularda suhbatlashishi yoki qurilmadan foydalanish bo‘yicha yo‘riqnoma bilan tanishtirishi mumkin. Yana bir farg‘onalik ishtirokchi tanlovda o‘zi yasagan termoelektrogenerator bilan qatnashdi. Ushbu qurilmani issiqlik yoki olovga yaqin tutish orqali undan elektr energiya olsa bo‘ladi.
Ayniqsa, surxondaryolik ishtirokchi qiz yaratgan “aqlli o‘rindik” tadbir qatnashchilarida katta qiziqish uyg‘otdi. Mo‘jaz ventilyator o‘rnatilgan soyabonli “aqlli o‘rindiq”da bir vaqtning o‘zida smartfon va boshqa elektron qurilmalarni zaryadlash mumkin. Nufuzli tanlovdan imkoniyati cheklangan yosh olimlarimiz ham chetda qolishmadi. Ular ham o‘z startaplari bilan faol raqobatga kirishib ketishdi. Jumladan, jizzaxlik yosh dasturchi Shohrux Mamadaliyev hali maktab o‘quvchisi va jismoniy imkoniyati cheklangan bo‘lishiga qaramay, onlayn bepul ta’lim berishga mo‘ljallangan sayt yaratib, uni yig‘ilganlarga taqdimot qildi. Umuman olganda, qishloq xo‘jaligini dronlar yordamida boshqarish, muqobil energiya, sug‘orish tizimlari kabi rang-barang loyihalar ishtirokchilar orasida qizg‘in raqobat muhitining paydo bo‘lishiga turtki berdi.
Hay’at a’zolarining uzoq davom etgan muhokamalaridan so‘ng nihoyat taqdim etilgan startaplar orasidan eng yaxshi 100 ta loyiha saralab olindi. 21-may kuni tadbirning so‘nggi bosqichi — taqdirlash marosimida g‘olib ishtirokchilarga va’da qilingan sovrinlar topshirildi. Ularning har biri BHMning 20 baravari (5 400 000 so‘m) miqdoridagi pul mukofotlari bilan moddiy rag‘batlantirildi.
Iste’dodli yoshlarni qo‘llab-quvvatlash “Ulug‘bek” jamg‘armasi, Innovatsion rivojlanish vazirligi hamda Yoshlar ishlari agentligi tomonidan tashkil etilgan ko‘rik-tanlovdan ko‘zlangan asosiy maqsad — bilim olishga intilayotgan iqtidorli yoshlarni qo‘llab-quvvatlash, iqtisodiyotning turli tarmoqlarida real qo‘llaniladigan va o‘zbekistonliklar farovonligini oshirishga xizmat qiladigan innovatsion loyihalarni amalga oshirishga ko‘maklashishdan iborat bo‘lib, tanlov tashkilotchilari barcha yoshlarga o‘z g‘oyalarini namoyish etish uchun birdek, teng sharoit yaratib berish vazifasini muvaffaqiyatli uddaladi deyish mumkin.
Bu kabi keng ko‘lamli musobaqalar orqali yaratilayotgan ekotizim kelgusida O‘zbekiston kelajagi uchun foyda keltiradigan olimlar yetishib chiqishiga zamin yaratishi shubhasiz.
Reklama huquqi asosida.
Izoh (0)