Qoraqalpog‘iston Respublikasi Vazirlar Kengashining qarori bilan investitsiyalar va tashqi savdo vaziriga ogohlantirish, transport vaziriga esa hayfsan berildi.
Ma’lum qilinishicha, Vazirlar Kengashi raisining o‘rinbosari — investitsiyalar va tashqi savdo vaziri Baxitjon Habibullayev prezident Shavkat Mirziyoyevning 2022-yil 23—24-fevral kunlari Qoraqalpog‘iston Respublikasiga tashrifi davomida berilgan topshiriqlar va 25-fevral kuni o‘tkazilgan yig‘ilish bayonida belgilangan topshiriqlar ijrosini ta’minlashda kamchiliklarga yo‘l qo‘ygani uchun qat’iy ogohlantirilgan.
Shuningdek, Qoraqalpog‘iston Respublikasi Vazirlar Kengashining Investitsiyalar va tashqi savdo, innovatsiyalar, xususiylashtirilgan korxonalarga ko‘maklashish masalalari bo‘yicha kotibiyati boshlig‘i A.Seytjanovga va Qoraqalpog‘iston Respublikasi transport vaziri Sultanbay Saparovga prezidenti hujjatlar hamda topshiriqlarining bajarilishini tashkil qilish, hujjatlar bilan ishlash, ijro intizomini nazorat qilish, topshiriqlar ijrosini ta’minlashda yuzaga kelgan muammoli masalalarni hal etish yuzasidan o‘z vaqtida zarur choralar ko‘rmagani uchun hayfsan e’lon qilingan va shaxsiy ish jildlariga qo‘shilgan.
Qoraqalpog‘iston Respublikasi avtomobil yo‘llari bosh boshqarmasi boshlig‘i M.Allambergenov esa mazkur lavozimga yangidan tayinlangani inobatga olinib, ogohlantirilgan.
Izoh (0)