O‘zbekistonda nogironligi bo‘lgan shaxslarning atigi 6 foizi ish bilan band qilingani ma’lum bo‘ldi

O‘zbekistonda nogironligi bo‘lgan 790 ming nafar fuqaroning atigi 5,9 foizi ish bilan band qilingan. Bu haqda Bandlik va mehnat munosabatlari vazirligida bo‘lib o‘tgan matbuot anjumanida xabar berildi, deya xabar berdi “Daryo” muxbiri.

Bandlik va mehnat munosabatlari vazirining birinchi o‘rinbosari Erkin Muhitdinovning ma’lumot berishicha, bugungi kunda, O‘zbekistonda 790 ming nafardan ortiq nogironligi bo‘lgan shaxslar rasman ro‘yxatga olingan bo‘lib, ularning 62 foizga yaqini qishloq joylarda istiqomat qiladi.

“Nogironligi bo‘lgan shaxslarning 123,9 ming nafari 16 yoshgacha bo‘lgan bolalar bo‘lsa, 666,3 ming nafardan ortig‘i 16 yoshdan kattalar hamda 201,7 mingdan ortig‘i pensiya yoshidagi kishilarni tashkil qiladi. Nogironligi bor fuqarolarning 248,2 ming nafardan ziyodi mehnat faoliyatiga layoqatli bo‘lib, shundan 46,7 ming nafari yoki bor-yo‘g‘i 18,8 foizi band qilingan. Bu jami nogironligi bo‘lgan shaxslarning atigi 5,9 foizi ishli ekanini bildiradi”, — deydi Erkin Muhitdinov.

Vazir o‘rinbosariga ko‘ra, nogironligi bo‘lgan shaxslarni davlat tashkilotlari va xususiy sektorning potensial xodimlari emas, balki asosan xayriya va reabilitatsiya yordamini oluvchilar sifatida qarash saqlanib qolmoqda.

“Jamiyatimizdagi noto‘g‘ri qarashlar ish beruvchilar tomonidan nogironligi bo‘lgan shaxslarning mehnat ko‘nikmalari, qobiliyatlari va iste’dodlariga ishonch yo‘qligi, shuningdek, ochiq mehnat bozorida ko‘p uchraydigan nogironlik belgisi bo‘yicha kamsitish hali ham bor. Bunga aksariyat, ish beruvchilarda nogironligi bo‘lgan shaxslarni ishga qabul qilish va ularga shart-sharoit yaratish hamda ijtimoiy himoya qilish borasida korporativ madaniyat yetarli darajada emasligi sabab bo‘lmoqda. Shu paytga qadar nogironligi bo‘lgan shaxslarni ishga qabul qilgan ish beruvchilarni moddiy qo‘llab-quvvatlashning samarali mexanizmlari yo‘lga qo‘yilmagan. Shuningdek, nogironligi bo‘lgan shaxslarni kasb-hunarga o‘qitish tizimi yetarli darajada yo‘lga qo‘yilmagan”, — deydi vazir o‘rinbosari.

Matbuot anjumanida qayd etilishicha, O‘zbekiston Respublikasining 2020-yil 20-oktabrdagi “Aholi bandligi to‘g‘risida”gi qonunida ish o‘rinlarining eng kam sonini belgilash va ish o‘rinlarini zaxiraga qo‘yish tartibi belgilangan.

“Ushbu yo‘nalishni tahlil qildik, jumladan, korxona va tashkilotlarda ishlayotgan xodimlar toifasi tahlil qilinganda, shtat birligi 20 tadan ortiq bo‘lgan 2 million 615 ming nafar xodimlar ishlovchi 17 030 ta korxona va tashkilotlarda 36,1 ming nafar nogironligi bo‘lgan shaxslar ishlayotganligi ma’lum bo‘ldi. Qonun talabiga asosan, ushbu korxonalarda jami shtat sonining 3 foizida ya’ni 78 470 ta ish o‘rinlarida nogironligi bo‘lgan shaxslar ishlashi lozim bo‘lsa, bizda yana qo‘shimcha ravishda 42 mingdan ortiq nogironligi bo‘lgan shaxslarni ishga joylashtirish imkoniyatlarimiz borligi ma’lum bo‘lmoqda”, — deydi mas’ul.