Ijtimoiy tarmoqlarda Qashqadaryo viloyatining Dehqonobod tumanidagi qishloqlarning biriga sel kelgani tasvirlangan videolar tarqaldi. Viloyat FVB mazkur holatga munosabat bildirib, sel oqibatida hech kimga ziyon yetmaganini ma’lum qildi.
Ma’lum qilinishicha, 19-may kuni soat taxminan 14:30—15:00 lar atrofida Dehqonobod tumani markazidan 45-50 kilometr uzoqlikdagi tog‘li hududlarda qisqa muddatli yog‘ingarchilik kuzatilgan.
Yog‘ingarchilik oqibatida hosil bo‘lgan yomg‘ir suvlari “Oqrabod” MFY Naymansoy qishlog‘i adirliklari yonbag‘rida joylashgan ayrim xonadonlarning tomorqalari va hovlilaridan oqib o‘tib, “Katta pay” o‘rmon xo‘jaligi dalalariga borib quyilgan.
“Ushbu holat bo‘yicha tuman FVB va mahalla faollari birgalikda aholi yashash xonadonlariga borib, yomg‘ir suvlari uylarning xonalariga toshishi (kirishi) holatlari kuzatilmagani hamda hech kimga ziyon yetmagani aniqlandi”, — deyiladi xabarda.
Eslatib o‘tamiz, 17-may kuni “O‘zgidromet” bosh direktori Sherzod Habibullayev o‘zining Facebook’dagi sahifasi orqali 18–23-may kunlari kutilayotgan kuchli yog‘ingarchiliklar sabab respublikaning tog‘oldi va tog‘li hududlarida sel xavfi yuzaga kelishi mumkinligidan ogohlantirgandi.
Izoh (0)