AQSH senati Ukrainaga taxminan 40 milliard dollar miqdorida qo‘shimcha yordam ajratish haqidagi qonun loyihasini bir ovozdan ma’qulladi, deya xabar qilgan Associated Press.
Senatorlar qonunni o‘tgan haftadayoq tezkor tartibda qabul qilmoqchi edi, ammo respublikachi Rend Pol mazkur hujjatga bir qator o‘zgartirishlar kiritish yuzasidan taklif berib, ushbu jarayonni muayyan vaqtga bloklagan.
Aprel oxirida AQSH prezidenti Jo Bayden mamlakat Kongressidan Ukrainani qo‘llab-quvvatlash uchun 33 milliard dollar ajratishni so‘ragan. Keyinchalik yordam puli miqdori Kongressning o‘zida qariyb 40 milliardga oshirilgan. Shundan teng yarmi, ya’ni 20 milliard harbiy ko‘mak sifatida yo‘naltiriladi.
11-mayda qonun hujjatini AQSH kongressining vakillar palatasi ma’qullagan. Hujjatni imzolash uchun 368 nafar kongressmen ovoz bergan (barcha demokratlar va ayrim respublikachilar), 57 nafar vakil esa uni imzolashga qarshi chiqqan (barchasi respublikachilar).
Pentagon hisob-kitoblariga ko‘ra Ukrainada urush boshlanganidan beri 6-may holatiga Ukrainaga AQSH hukumati tomonidan 3,8 milliard dollarlik harbiy yordam yuborilgan. 9-mayda Bayden Ukrainaga lend-liz dasturi bo‘yicha qurol-yarog‘ yetkazib berish haqidagi qonunni imzolagandi.
Izoh (0)