19-may kuni “Milliy tiklanish” demokratik partiyasi fraksiyasining yig‘ilishida deputatlar “O‘zbekiston Respublikasi Ma’muriy javobgarlik to‘g‘risidagi kodeksiga o‘zgartishlar kiritish haqida”gi qonun loyihasini muhokama qildi. Bu haqda partiya matbuot xizmati xabar berdi.
Ushbu qonun loyihasi bilan Milliy gvardiyaga jamoat tartibiga tajovuz qilingan huquqbuzarliklarni ko‘rib chiqish va ma’muriy bayonnomalarni rasmiylashtirish vakolati berilmoqda.
Shuningdek, deputatlar “Yo‘l harakatini tashkil etish to‘g‘risida”gi qonuni loyihasini ham muhokama qilgan. Ta’kidlanishicha, bugungi kunda yo‘llarning holati o‘sib borayotgan transport vositalarining tirbandliklarsiz harakatlanishini ta’minlashga javob bermaydi. Bu borada jamoatchilik ishtirokini belgilovchi normalar mavjud emas. Bunday kamchilik va muammolarni bartaraf etish bo‘yicha normativ-huquqiy hujjatni ishlab chiqish zarurati tug‘ilmoqda.
Yig‘ilish davomida fraksiya rahbari Alisher Qodirov yo‘l ta’mirlash ishlarini faqat tungi vaqtlarda amalga oshirish kerakligini, chunki ish vaqtidagi bunday harakat katta tirbandlikni keltirib chiqarayotganini ta’kidlagan.
“Bugun bu jarayonni qonunchilik bilan tartibga solish, ya’ni yo‘l ta’mirini faqat tungi vaqtlarda amalga oshirish vaqtini qonun bilan aniq belgilash kerak. Bu dunyo tajribasida bor”, – deydi fraksiya yetakchisi.
Eslatib o‘tamiz, fevral o‘rtalarida Oliy Majlis Qonunchilik palatasi spikeri o‘rinbosari, deputat Alisher Qodirov yo‘llarda xavfsizlikni ta’minlash masalasiga bag‘ishlangan yig‘ilishda ishtirok etganini ma’lum qilib, qoidabuzarlarni jazolash, tirbandliklarning oldini olish borasidagi fikrlari bilan bo‘lishgandi. O‘shanda u “Nima uchun davlat xizmatida ish boshlash vaqtini 08:30, oliygohlarda o‘qish boshlash vaqtini 10:00 ga belgilash mumkin emas? Osmon uzilib yerga tushmaydi”, degandi.
Izoh (0)