Toshkent viloyatida yer sotishda sheriklik qilgan kadastr xodimlari qo‘lga tushdi

Toshkent viloyatining Piskent tumanida kadastr bo‘limi xodimlari yer maydonlarini sotgan shaxslarga sheriklik qilgani aniqlandi. Bu haqda Bosh prokuratura huzuridagi departament xabar berdi.

Ma’lum qilinishicha, “A.G.” uzumchilik va bog‘dorchilik shirkatining murojaatiga asosan o‘tkazilgan tergovga qadar tekshiruvda, fuqaro T.T., Davlat kadastrlari palatasining Olmaliq shahar filiali mutaxassisi A.N. va Piskent tumani filiali kadastr muhandisi B.Sh. o‘zaro til biriktirib, Piskent tumani hokimining 2020—2021-yildagi qaroriga ilova qilingan ro‘yxatni soxtalashtirgan.

Ular “A.G.” shirkatiga qarashli yer maydonlarini fuqarolarga 6-8 sotixdan 2 000 dan 15 000 dollargacha sotib, kadastr hujjatlarini rasmiylashtirish uchun yana 1-2 million so‘mdan pul olib, 14 nafar fuqaroning jami 562,4 million so‘mini firibgarlik yo‘li bilan qo‘lga kiritgan.

Tekshiruv davomida A.N. va B.Sh. o‘z aybiga iqror bo‘lib, yetkazilgan zararni qoplash uchun 13,1 million so‘m taqdim qilgan.

Mazkur holat yuzasidan Jinoyat kodeksining 168-moddasi (firibgarlik) va 28, 211-moddasi (pora berish) hamda 228-moddasi (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) bilan jinoyat ishi qo‘zg‘atilib, tergov harakatlari o‘tkazilmoqda.

Ma’lumot uchun, Kadastr agentligi tomonidan yer va kadastr nazorati yo‘nalishida 2022-yilning yanvaridan 1-mayiga qadar yer nazoratini amalga oshirish bo‘yicha olib borilgan nazorati tadbirlari natijasida jami 6 215 ta holatda 2 245,6 gektar yer o‘zboshimchalik bilan egallab olingani aniqlangan.