Surxondaryodan Toshkentga noma’lum hayvonga tegishli go‘shti mahsulotlarini olib kelayotgan uchta avtomobil to‘xtatib qolindi. Bu haqda “Nasaf TV” telekanali orqali efirga uzatilgan lavhada ma’lum qilindi.
Ma’lum qilinishicha, 14-may kuni Ko‘kdala tuman hududida joylashgan “Umakay” muntazam YPX maskanida uchta avtomobil nazorat tekshiruvi uchun to‘xtatilgan. Surxondaryo—Toshkent yo‘nalishida harakatlanib kelgan ikki nafar denovlik hamda qibraylik haydovchilarga tegishli mashinalari tekshirilib, ularning yukxonasi ko‘zdan kechirilganda, tegishli veterinariya hujjatlarisiz, kelib chiqishi noma’lum bo‘lgan 914 kilogramm go‘sht mahsuloti borligi aniqlangan.
Holat yuzasidan haydovchilarga nisbatan Ko‘kdala tumani IIB xodimlari tomonidan surishtiruv harakatlari olib borilmoqda.
Laboratoriya tahlillari natijasiga ko‘ra ular yaroqsiz deb topilgan va tegishli tartibda yo‘q qilingan.
Avvalroq Jizzaxda Nexia yukxonasi va salonidan Toshkentga olib ketilayotgan 712 kg noma’lum hayvon go‘shti topilgani, Buxorodan Toshkentga 500 kg iste’molga yaroqsiz go‘sht olib ketayotgan Isuzu to‘xtatib qolingani to‘g‘risida xabar berilgandi.
Izoh (0)