Rossiyadagi McDonald’s biznesini Nazarboyevning qarindoshi sotib olishi mumkin

Avvalroq mahalliy bozordan ketishi haqida e’lon qilgan McDonald’s kompaniyasining Rossiyadagi biznesini yaqin vaqtlarda Qozog‘iston sobiq prezidenti Nursulton Nazarboyevning qarindoshi Kayrat Boranbayev yoki novokuznetsklik biznesmen Aleksandr Govor sotib olishi mumkin. Bu haqda The Bell nashri “kompaniya taqdirini kuzatib borayotgan” manbalariga tayanib xabar berdi va oldi-sotdi haqida 19-may, bugun rasman e’lon qilinishi mumkinligini ta’kidladi.

Boranbayev SPP kompaniyasiga egalik qilib, u McDonald’s’ning Sverdlov, Orenburg, Chelyabinsk, Kurgan, Tyumen va Kirov viloyatlaridagi tarmoqlarini boshqargan. Tadbirkor Belarus va Qozog‘istondagi McDonald’s franshizasiga egalik qiladi. Shuningdek, “KazRosGaz” QK AJ sobiq bosh direktori sifatida ham taniqli. Avvalroq “Kommersant”ning ikkita manbasi ham Kayrat Boranbayevning tuzilmalari McDonald’s xususiy obyektlarining yangi egasiga aylanishini taxmin qilgandi.

Kayrat Boranbayev Qozog‘istonning eng boy biznesmenlari ro‘yxatiga kirgan. U mamlakat sobiq prezidenti Nursulton Nazarboyev oilasining a’zosidir: uning qizi Nazarboyevning 2020-yilda vafot etgan nevarasiga turmushga chiqqan edi. 2022-yil bahorida Boranbayev jinoiy ta’qibga uchradi — qishki noroziliklardan keyin Nazarboyev atrofidagi boshqa bir qator odamlar singari. U o‘g‘irlik haqidagi ish bo‘yicha hibsga olingandi.

Aleksandr Govorning “GiD” kompaniyasi McDonald’s’ning Novosibirsk, Berdsk, Tomsk, Kemerovo, Novokuznetsk, Barnaul va Krasnoyarskdagi 25 ta muassasasiga rahbarlik qilgan. Govor, shuningdek, “NefteXimServis” neftni qayta ishlash korxonasi direktorlar kengashi a’zosi ham hisoblanadi.

Kompaniya vakillari The Bell nashri so‘roviga javob bermadi va McDonald’s bilan ehtimoliy bitimni izohlamadi.

Avvalroq McDonald’s Rossiyadan butunlay chiqib ketishini e’lon qilgandi. “Kompaniya Rossiyadagi barcha McDonald’s restoranlarini mahalliy xaridorga sotish niyatida. Kompaniya ushbu restoranlarni “dearxizatsiya” jarayonini boshlamoqchi, bu esa McDonald’s nomi, logotipi, brendingi va menyusidan foydalanishni taqiqlashni nazarda tutadi”, — deyilgandi kompaniya bayonotida.