“PSJ” mavsumni klub uchun rekord darajadagi daromad bilan yakunladi.
L’Equipe nashrining xabariga ko‘ra, parijliklar 2021/22-yilgi mavsumda 700 million yevro daromad ko‘rgan. Bu ko‘rsatkich 2018/19-yildagi rekord — 637,3 million yevrodan ham oshib ketdi.
Lionel Messining jamoaga kelishi ortidan parijliklar 11 ta yangi homiyga ega bo‘ldi. Bu yo‘nalishdagi umumiy daromad 310 million yevroga yetgan.
GOAT onlayn-savdo platformasi bilan tuzilgan shartnoma fransuz klubiga uch yil davomida 50 million yevro olib keladi. Bundan tashqari Qatar Airways bilan hamkorlik 60—70 million yevro daromad keltiradi.
Shuningdek, Messining “PSJ” safiga o‘tishi futbolkalar savdosiga ham jiddiy ta’sir ko‘rsatdi. Sotilgan futbolkalarning soni milliondan oshadi, ularning 60 foizi Messi ismi tushirilgan liboslar.
O‘tkazilgan o‘yinlardan keyingi daromad ham 2019/20-yilgi mavsumdagi 93 million yevrodan joriy mavsumda 132 million yevrogacha ko‘tarildi. Ushbu daromad keyingi mavsumda yanada oshishi kutilmoqda.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)