Lada Xray ishlab chiqarilishi to‘xtashi mumkin. Bu model O‘zbekistonda ham yig‘iladi

Rossiyaning “AvtoVAZ” kompaniyasi Xray modeli ishlab chiqarishni to‘xtatishi mumkin, deb xabar berdi “Autonews.ru”.

Mavjud ma’lumotlarga ko‘ra, kompaniya Xray modelining yangi avlodini yaratish bilan shug‘ullanmaydi va joriy versiyasini yangilash ustida ishlamaydi.

Bundan tashqari, model tez orada konveyerni butunlay tark etishi mumkin. Sababi — Renault’ning Rossiyadan ketishi va butlovchi qismlarni yetkazib berishdagi qiyinchiliklar.

Xray “AvtoVAZ” birinchi bo‘lib mikrochip yetishmasligidan aziyat chekdi. 2021-yil iyul oyida zavod Lada EnjoY Pro multimedia tizimiga ega ushbu avtomobillarni ishlab chiqarishni to‘xtatib qo‘ygan edi. O‘sha vaqtdan beri bunday konfiguratsiyalarni yig‘ish qayta tiklanmadi, — deyiladi xabarda.

“AvtoVAZ” bunga izoh berishdan bosh tortdi.

O‘zbekistonda Xray SKD usulida ADM-Jizzakh avtomobil zavodida yig‘iladi. Narxlar 178,9 million so‘mdan boshlanadi.

Avvalroq O‘zbekistonda Lada avtomobillarini to‘liq ishlab chiqarish yo‘lga qo‘yilishi rejalashtirilgani haqida xabar berilgan edi.