Rossiya va Ukraina muzokaralar to‘xtatilganini ma’lum qildi

Ayni paytda Moskva va Kiyev o‘rtasida tinchlik muzokaralari olib borilmayapti. Bu haqda Rossiya tashqi ishlar vaziri o‘rinbosari Andrey Rudenko ma’lum qildi, deb yozadi Meduza.

“Ukraina aslida muzokaralar jarayonidan chiqib ketgan”, — dedi u va Kiyev Rossiya tomonidan taqdim etilgan shartnoma loyihasiga o‘z javobini bermaganini qo‘shib qo‘ydi. Rudenkoning fikricha, Ukraina tomoni muzokaralarning “avvalgi bosqichlarida kelishilib bo‘lgan qoidalarni puchga chiqarishga harakat qilmoqda.

Keyinroq muzokaralardagi pauzani Ukraina prezidenti ofisi rahbari maslahatchisi Mixail Podolyak ham tasdiqladi.

“Ukraina va RF o‘rtasidagi muzokaralar jarayoni to‘xtatildi. Ammo u qaytadan boshlanadi va, menimcha, moderator Zelenskiy bo‘ladi”, — dedi Podolyak. Uning qo‘shimcha qilishicha, Ukraina “Putinning obro‘sini saqlab qolish uchun” nimadandir voz kechmoqchi emasligini, chunki “jamiyat katta tovon to‘lab qo‘ygan”.

Muzokaralarning so‘nggi yuzma-yuz raundi Istanbulda aprel boshida bo‘lib o‘tgandi. Uning yakunlariga ko‘ra ikkala tomon muzokaralar jarayonida muayyan progressga erishilganini ma’lum qilgandi. Ko‘p o‘tmay Moskva Kiyevni tutriqsizlikda va kelishilgan bitimlardan og‘ishga urinishda ayblashni boshladi. Ukraina hukumati, o‘z navbatida, vaqt o‘tishi bilan Rossiya armiyasi jinoyatlari haqidagi ma’lumotlar fonida Ukraina jamiyati RF bilan qandaydir bitimlarga tobora kamroq tayyor bo‘lib borayotganini ayta boshladi.

Avvalroq Rossiya va Ukraina o‘rtasidagi tinchlik muzokaralari turg‘un holatda ekani ma’lum qilingandi. Rossiya muzokaralarning buzilishida Ukrainani aybladi. “Ukraina siyosatchilarining bayonotlari ularning muzokaralarni davom ettirishni istamasligidan yaqqol dalolat beradi”, — dedi Rossiya Tashqi ishlar vazirligining axborot va matbuot departamenti direktori o‘rinbosari Aleksey Zaytsev.