Andijon viloyatida 2022-yilning o‘tgan uch oyi davomida 10 nafar o‘quvchi tomonidan o‘z joniga qasd qilish holatlari kuzatilgan. Bu haqda “Daryo” muxbiri xabar bermoqda.
Ta’kidlanishicha, xalq deputatlari Andijon viloyati kengashi deputatlari tomonidan viloyat hokimligi Bolalarni himoya qilish masalalari kotibiyati mudiri Muftohiddin Raxmanovning axboroti tinglangan.
Qayd etilishicha, viloyatdagi umumta’lim maktablarida voyaga yetmagan 570 ming 282 nafar o‘quvchi tahsil oladi. O‘quvchilarning 1348 nafari ota-onalari bilan birgalikda xorijga chiqib ketgan, 303 nafari surunkali dars qoldirishi, 935 nafari noodatiy kiyingani, 863 nafari jinoyatchilikka moyilligi borligi, 653 nafari tarbiyasi og‘irligi aniqlangan.Voyaga yetmaganlar orasida sodir etilgan jinoyat, huquqbuzarliklar hamda ular tomonidan o‘z joniga qasd yoki suiqasd qilish kabi salbiy holatlar yuzasidan ishlar tahlil qilinganda, 2022-yil 31-mart holatida 25 ta vaziyatda 48 nafar voyaga yetmaganlar tomonidan jinoyat sodir etish holati kuzatilgani ma’lum bo‘lgan. Mazkur jinoyatlarda ishtirok etganlarning 7 nafari akademik litsey va kasb-hunar kollejlari, 27 nafari esa maktab o‘quvchilari ekani, qolgan 14 nafari esa hech qayerda o‘qimaydigan yoki ishlamaydiganlarni tashkil qilishi aniqlangan.
Bundan tashqari, umumta’lim maktablarining 10 nafar o‘quvchisi tomonidan o‘z joniga qasd yoki suiqasd qilish holatlari kuzatilgan bo‘lib, 2021-yilga nisbatan uchtaga ortgan. Shuningdek, 32 nafar bedarak yo‘qolgan bola huquqni muhofaza qiluvchi organlar tomonidan topilib, oilasiga qaytarilgan.
Izoh (0)