O‘zbekistonning 7 ta hududida Qrim-Kongo isitmasi bilan kasallanganlarning qon plazmasi banki tashkil etiladi

O‘zbekistonning bir qator viloyatlarida virusli infeksiyalar tarqalishiga qarshi kurashish bo‘yicha davolash-profilaktik ishlar amalga oshiriladi. Bu haqda Sog‘liqni saqlash vazirligi xabar qildi.

Qayd etilishicha, prezidentning “Ayrim dolzarb virusli infeksiyalar tarqalishiga qarshi kurashish chora-tadbirlarini takomillashtirish to‘g‘risida”gi qarori qabul qilingan. Hujjatga asosan:

• SSV 2022-yil 1-noyabrga qadar “IT-Med” MCHJ tomonidan jigar surunkali virusli kasalligining yagona elektron reyestrini ishlab chiqib, kelgusida uning texnik va dasturiy qo‘llab-quvvatlanishini ta’minlaydi;
• 2023-yil 1-yanvarga qadar reyestrni yuritishni qon va uning tarkibiy qismlari bilan ishlaydigan xodimlarga ega bo‘lgan davolash-profilaktika muassasalari, sanitariya-epidemiologiya xizmati hamda mulkchilik shaklidan qat’i nazar barcha tibbiyot tashkilotlariga joriy qilib, ularning o‘zaro integratsiyasi yo‘lga qo‘yiladi;
• 2022-yil 1-iyuldan boshlab Virusologiya ilmiy-tadqiqot institutida hamda vazirlik tomonidan belgilanadigan Qoraqalpog‘iston, Navoiy, Buxoro, Qashqadaryo, Surxondaryo, Jizzax va Sirdaryo viloyatlaridagi tegishli muassasalarda Qrim-Kongo gemorragik isitmasi bilan kasallanib tuzalganlarning (donorlarning) qon plazmasi banki yaratilishi ta’minlanadi;
• davolash-profilaktika muassasalari va nodavlat tibbiyot tashkilotlarida yuqumli kasalliklarga, shu jumladan, surunkali virusli gepatitlarga tashxis qo‘yish va ularni davolash standartlarini takomillashtiradi hamda ularga rioya qilinishi ustidan nazorat kuchaytiriladi.

2024-yil 1-yanvardan boshlab nodavlat tibbiyot tashkilotlarida qon va uning tarkibiy qismlari bilan ishlayotgan xodimlar gepatit B infeksiyasiga qarshi emlangan bo‘lishi hamda reyestrning belgilangan tartibda yuritilishi tibbiy faoliyatni litsenziyalash talablari va shartlaridan biri hisoblanadi.