Hech qachon kech emas: Janet Jekson, Naomi Kempbell va katta yoshida ona bo‘lishga qaror qilgan mashhur ayollar (foto)

Tibbiyot ulkan qadamlar bilan oldinga harakatlanmoqda. Agar ilgari 40 yoshdan keyin farzand ko‘rish xavfli deb hisoblangan bo‘lsa, endilikda 50 yoshdan keyin ham ona bo‘lish hech qanday muammoga olib kelmaydi. Zamonaviy texnologiyalar farzand ko‘rish orzusidagi ayollarga yordam beradi. Grazia nashri 1966-yil 16-mayda tug‘ilgan Janet Jeksonning 56 yoshga to‘lishi munosabati bilan katta yoshida ona bo‘lishga qaror qilgan yulduzlar haqida ma’lumotlarni taqdim etdi.

Janet Jekson 

Maykl Jeksonning singlisi birinchi marta 50 yoshida ona bo‘ldi. U qatarlik millioner bilan Issa al-Mana ismli o‘g‘ilning ota-onasiga aylandi. Farzandini 50 yoshida bag‘riga bosgan ona o‘zining merosxo‘rini haqiqiy ne’mat deb bilishini bir necha bor ta’kidladi — chunki unda homiladorlik jarayoni oson kechmadi. Xonanda hatto gastrollarni ham bekor qilishga majbur bo‘ldi: u o‘z e’tiborini oilasiga qaratmoqchi ekanligini ma’lum qildi. Shuningdek, farzandining otasi bilan munosabatlar tez orada buzilganiga qaramay, Janet o‘zini hamon eng baxtli odam deb biladi.

Naomi Kempbell

51 yoshga to‘lishidan biroz oldin mashhur modelning qizi dunyoga keldi. “Kichik baxt meni ona sifatida tanladi. Hayotimda shunday samimiy qalb borligi men uchun katta sharaf”, — deb yozdi Naomi sahifasida Internet foydalanuvchilarini hayratda qoldirib. Axir uning homiladorligini deyarli hech kim ko‘rmagan. Model hozirgi kunga qadar farzandini o‘zi dunyoga keltirganmi yoki surrogat ona yordamidan foydalanganmi — bu haqda gapirmaydi.

Ingeborga Dapkunayte

Eng sirli aktrisalardan Ingeborga shaxsiy hayoti haqida hech narsani ochiqlamaydi. Bir necha yillardan keyingina Ingeborganing 2013-yilda turmushga chiqqani ma’lum bo‘ldi. Aktrisaning o‘g‘li borligini dastlab uning hamkasblari ham bilmagan. Faqat uning 55 yoshida yubileyga tayyorlangan “Men haqimda yozilgan hamma narsa ham haqiqat emas” filmida u nihoyat o‘g‘li Aleksni tanishtirdi. Lekin bolakay o‘sha paytda atigi 2 yoshda bo‘lgan.

Brigitta Nilsen 

Aktrisa Brigitta Nilsen “Qizil soch Sonya” filmidagi rolidan so‘ng, shuningdek, Silvestr Stallone bilan turmush qurishi tufayli mashhur bo‘ldi. U besh marta turmushga chiqdi va besh nafar farzand ko‘rdi. Brigitta 55 yoshga to‘lishi arafasida qizlarining eng kichigi Fridani dunyoga keltirdi. “Ayollar hamma narsa mumkinligini bilishlari kerak. Ammo tan olish kerak: umidsizlikdan qochib qutula olmaysiz ”, — dedi u muxlislarga.

Sofi B. Xoukins 

31 yoshida 15 ta embrionini muzlatib qo‘ygan Sofi oradan 19 yildan o‘tib, ikkinchi marta ona bo‘lishga tayyorligini anglab yetdi. “50 yosh — ikkinchi farzand ko‘rish uchun ajoyib yosh. Men ancha dono va xotirjamlikka erishdim. Shuningdek, ba’zi narsalarga hazilomuz munosabatda bo‘lishni o‘rgandim. Farzandim bilan bir-birimizni tushunishimiz ancha oson va men bunday imkoniyat uchun juda minnatdorman”, — dedi Sofi intervyusida.

Keti Sagal 

2004-yilda Keti ikki farzandi bor Kurt Satter ismli erkakka turmushga chiqdi. U turmush o‘rtog‘ining farzandlariga ona bo‘ldi, ularni o‘z oilasi kabi sevdi, lekin bir necha yil o‘tgach, Ketining o‘zi ham farzandli bo‘lishni xohlayotganini tushundi. Aktrisa surrogat onaning yordamiga murojaat qildi — chaqaloq Esme dunyoga kelganida, Sagal 52 yoshda edi.