“Liverpul” 16 yil deganda Angliya Kubogiga ega chiqdi va rekord qayd etdi

“Liverpul” Angliya Kubogi finalida “Chelsi”ni mag‘lub etdi (0:0, penaltilar — 6:5) va sovringa ega chiqdi.

“Qizillar” joriy mavsum Angliya Liga Kubogida ham g‘alaba qozongandi. O‘shanda ham finalda “Chelsi” penaltilar seriyasida taslim etilgandi. “Qizillar” ikkinchi marta bir mavsum davomida ushbu ikki sovringa ega chiqdi. Avvalroq “Liverpul” 2000/01-yilgi mavsumda Angliya Kubogi va Liga Kubogida zafar quchgandi. Hali hech qaysi jamoa ikki marta bu natijaga erishmagan.

Mersisaydliklar 2006-yildan beri ilk bor va o‘z tarixida 8-marta Angliya Kubogiga ega chiqdi. Faqat “Arsenal” (14) va “Manchester Yunayted” (12) bu borada ulardan oldinda. Shuningdek, “Chelsi” va “Tottenhem”da ham sakkiztadan sovrin bor.