Prezident Shavkat Mirziyoyevning Farg‘ona viloyati Furqat tumanidagi “Usta Yusufjon naqqosh” oilaviy korxonasiga tashrifi paytida hunarmand bo‘lib ko‘ringan shogird Furqat tumani hokimi haydovchisi haqida qo‘shimcha izoh berildi.
Prezident Shavkat Mirziyoyev va Ilhom Ahmadjonov
Foto: Prezident matbuot xizmati
Ijtimoiy tarmoqlarda prezident Shavkat Mirziyoyev Farg‘ona viloyatiga tashrif doirasida Furqat tumanidagi “Usta Yusufjon naqqosh” oilaviy korxonasida bo‘lganida olingan suratda davlat rahbarining orqasida o‘ymakor shogird libosida tuman hokimining haydovchisi turganligi qayd etilgan material e’lon qilingandi. Ortidan esa prezident bilan muloqot qilgan yana bir usta tumandagi 21-maktab direktor o‘rinbosari ekani haqida chiqishlar paydo bo‘lgan edi.
Furqat tumani hokimligining ma’lum qilishicha, haqiqatdan ham, rasmda ko‘zga tashlangan shaxs Furqat tuman hokimining haydovchisi Ilhom Ahmadjonov bo‘lib, u O‘zbekiston xalq ustasi Muhammadali Yunusovning shogirdlaridan biri hisoblanadi.
Ta’kidlanishicha, Ilhom Ahmadjonov bir yildan beri Furqat tuman hokimligida haydovchi bo‘lib faoliyat ko‘rsatib keladi. Avvaldan o‘zida o‘ymakorlikka, duradgorlikka qiziqish borligi sabab, tumanga kelgach “Usta Yusufjon naqqosh” oilaviy korxonasida milliy yog‘och o‘ymakorligi san’ati o‘rganish imkoniyati mavjudligidan foydalanib, shogird sifatida hunar sirlarini o‘rgana boshlagan.
“Kechagi tashrifda ham korxonada doimiy faoliyat olib borayotgan ustalardan tashqari Hunarmandlar maktabining qator o‘rganuvchilari ham bo‘lishganini e’tiborga olganda, Ilhom Ahmadjonovning ham ular qatorida u yerda bo‘lishi tabiiy holatdir. Aytib o‘tish kerakki, Muhammadali Yunusovning korxonasida o‘ymakorlik o‘rganayotgan shogirdlarning ko‘plari boshqa kasb hamda ish egalari”, — deyiladi munosabatda.
Shuningdek, davlat rahbari bilan muloqot qilgan Ilhomjon Sulaymonov faoliyati davomida maktabda mehnat fanidan o‘qituvchi bo‘lgan, o‘quvchilarga duradgorlik va o‘ymakorlik bo‘yicha saboq bergan. Hozirda tumandagi 21-maktabda ma’naviy-ma’rifiy ishlar bo‘yicha 0,75 stavkada direktor o‘rinbosar bo‘lib ishlab keladi. Uzoq yillardan beri amaliy o‘ymakorlik bilan shug‘ullanadi, “Usta Yusufjon naqqosh” oilaviy korxonasida tushdan keyin usta-o‘rgatuvchi lavozimida ishlaydi. 10 nafar shogird biriktirilgan.
Shavkat Mirziyoyev va Ilhomjon Sulaymonov
Foto: Prezident matbuot xizmati
Hokimlik ijtimoiy tarmoqlarda bunday xabarlarni tarqatishdan avval masalaga oydinlik kiritish uchun hokimlik axborot xizmatiga murojaat qilishni so‘ragan.
