Qozog‘istonda ichida O‘zbekiston fuqarolari bo‘lgan avtobus ag‘darilib ketgani to‘g‘risida xabar berilgandi. FVV matbuot xizmatining ma’lum qilishicha, Jambil viloyati Jualin tumanida sodir bo‘lgan yo‘l-transport hodisasida jabrlanganlar O‘zbekistonga olib kelingan.
O‘zbekiston prezidentining tezkor topshiriqig‘a asosan hukumat qarori bilan Favqulodda vaziyatlar vazirining o‘rinbosari A.Latifjonov boshchiligida ishchi guruh tashkil etilgandi. Ishchi guruh 13-may kuni soat 18:05 da Jualin tumanining markaziy shifoxonasiga yetib borib, Qozog‘istonning mas’ul idoralari rahbarlari bilan uchrashgan va hamkorlik asosida tashkiliy hamda amaliy harakatlar olib borilgan. Soat 23:40 da jabrlanganlar Jualin tuman markaziy shifoxonasidan yo‘lga chiqib, 14-may kuni soat 04:55 da O‘zbekiston va Qozog‘iston chegarasi “G‘ishtko‘prik” bojxona maskaniga yetib kelgan.
Ta’kidlanishicha, Qozog‘iston mas’ullari yuzaga kelgan mazkur baxtsiz hodisa oqibatlarini zudlik bilan bartaraf etish, jarohatlanganlarga tez tibbiy yordam ko‘rsatishda yaqindan ko‘mak bergan.
Favqulodda vaziyatlar, Ichki ishlar, Tashqi ishlar, Sog‘liqni saqlash va Transport vazirliklari hamkorligida ikki nafar vafot etgan fuqarolarning jasadlari yashash manzili – Buxoro va Xorazm viloyatlariga yuborilgan. Hozirda mahalliy hokimliklar tomonidan marosim tadbirlarini o‘tkazish yuzasidan tayyorgarlik ishlari olib borilmoqda. 14-may kuni baxtsiz hodisa oqibatida yana bir fuqaro vafot etgan. Ayni paytda marhumni olib kelish yuzasidan zarur choralar ko‘rilmoqda.
Olib kelingan 23 nafar fuqarodan 18 nafar jarohatlangani Respublika shoshilinch tez yordam ilmiy markaziga joylashtirilgan, 5 nafar fuqaroning ahvoli yaxshi bo‘lgani uchun uyiga javob berilgan.
Hozirgi vaqtda markazga joylashtirilgan fuqarolarning ahvoli shifokorlarning qat’iy nazoratiga olinib, tegishli muolajalar o‘tkazilmoqda.
Avvalroq Jambildagi avariya oqibatida oqibatida 2 kishi vafot etgani (O‘zbekiston fuqarolari), 4 kishi reanimatsiya, 13 kishi esa travmatologiya bo‘limiga joylashtirilgani to‘g‘risida xabar berilgandi.
Izoh (0)