Qashqadaryo viloyati Kitob tumanida qishloq xo‘jaligi mahsulotlari zaxirasi uchun ajratilgan kredit mablag‘ini o‘zlashtirgan fermer xo‘jaligi rahbari aniqlandi. Bu haqda Iqtisodiy jinoyatlarga qarshi kurashish departamenti xabar qildi.
Qayd etilishicha, Bosh prokuratura huzuridagi departamentning Kitob tuman bo‘limi tomonidan tergovga qadar tekshiruv o‘tkazilgan. Unda aniqlanishicha, “N.5.” fermer xo‘jaligi rahbari R.M. 2020-yilda hududdagi tijorat banki filialidan qishki mavsumga qishloq xo‘jaligi mahsulotlarini zaxira qilish uchun 1 yil muddatga 1,5 milliard so‘m kredit ajratilishiga erishgan. Kredit evaziga 14 nafar fuqarodan qishloq xo‘jalik mahsulotlari olgani to‘g‘risida soxta shartnomalarni rasmiylashtirib, amalda qishki mavsumga zaxirani yaratmasdan juda ko‘p miqdordagi kredit mablag‘ini o‘zlashtirish yo‘li bilan talon-toroj qilgan.
Holat yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) va 228-moddasi (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) bilan jinoyat ishi qo‘zg‘atilgan. Hozirda tergov harakatlari o‘tkazilmoqda.
Mavzuga doir:
- Kattaqo‘rg‘onda eski tomchilatib sug‘orish uskunalarini o‘rnatib, kredit mablag‘ini o‘zlashtirgan fermer xo‘jaligi rahbari aniqlandi
- Andijonda issiqxona uchun ajratilgan 50 ming dollarni talon-toroj qilgan bank filiali boshqaruvchisining sobiq o‘rinbosari qo‘lga tushdi
- Toshkentda xorij fuqarosiga tegishli qurilish materiallari ishlab chiqaruvchi uskunalar talon-toroj qilindi
Izoh (0)