“Hokim, sektor rahbarlari nima qilgan?” Prezident Farg‘onadagi sayyor qabullarda ko‘tarilgan muammolar haqida

Shavkat Mirziyoyev 13-may kuni Farg‘ona viloyati faollari bilan o‘tkazilgan uchrashuvda viloyatda mutasaddilar ishtirokida sayyor qabullar bo‘lib o‘tgani, ularda ko‘tarilgan muammolarning ko‘pi mahalliy darajada ekaniga e’tibor qaratdi.

“Bu yerga kelishdan oldin qabullar tashkil qildik. Aholi murojaatlarining 45 foizi joyida hal qilingan. Bu yaxshi va biz bu amaliyotni davom ettiramiz. Lekin savol tug‘iladi: hokim, sektor rahbarlari nima qilgan? Bunday mas’uliyatsizlik, odamlarni ovora qilishga chek qo‘yish kerak”, — deya uning so‘zlarini keltirdi prezident matbuot xizmati.

Uchrashuvda aholi tashabbuslari qo‘llab-quvvatlanib, har bir mahallaning ixtisoslashuvi rivojlantirilishi, 2022-yilda 147 ming fuqaro bandligini ta’minlash uchun 1 trillion so‘mdan ortiq mablag‘ yo‘naltirilishi aytildi.

“Hamma sohada mahalla tizimining rolini oshiryapmiz. Mahalla xalqning fikri degani, xalqning istagi degani. Buning uchun huquqiy asos yaratdik. Farg‘ona viloyatida 1062 ta mahalla bor. Hokimdan tortib mahalla raisigacha birlashib, tegishli tashkilotlarni jalb etib, odamlarning og‘irini yengil qilishi kerak. Farg‘ona bu masala bo‘yichayam namuna bo‘lishi kerak”, — degan Shavkat Mirziyoyev.

Davlat rahbari mahallalarni rivojlantirish, ijtimoiy masalalarni hal etishda tadbirkorlar tayanch ekanini ham ta’kidlagan. “Tadbirkorlarga sharoit yaratsak, odamlarga nafi tegadi, yoshlarni o‘z ortidan ergashtiradi. Tadbirkorni siylasak, u xalqni siylaydi”, — degan u.

Viloyat tadbirkorlarining 183 ta investitsiya loyihasini moliyalashtirish uchun Tiklanish va taraqqiyot jamg‘armasidan qo‘shimcha 23 million dollar yo‘naltirilishi belgilandi.

Shuningdek, uy-joy va yo‘llar qurish, elektr energiyasi va ichimlik suvi ta’minotini yaxshilash, maktab va bog‘chalarni ta’mirlash bo‘yicha rejalar ma’lum qilindi.

“Biz Farg‘onadan katta natijalar kutamiz. Bu el tarixdan ilm, tartib, madaniyat, hunarmandlik bo‘yicha namuna bo‘lgan. Farg‘onaliklar mehnatsevar, ishbilarmon. Bu salohiyatni, ichki imkoniyatlarimizni to‘liq yo‘lga qo‘yib, xalqimizni rozi qilish kerak”, — deb ta’kidlagan Shavkat Mirziyoyev.