Angliya Premyer Ligasi aprel oyining eng yaxshilari nomini ma’lum qildi.
“Byornli” bosh murabbiyi vazifasini bajaruvchi Maykl Jekson Angliya Premyer Ligasining aprel oyidagi eng yaxshi murabbiyi deb topildi. Mutaxassis qo‘l ostida jamoa 3 g‘alaba va bitta durang natija qayd etdi.
Jeksondan tashqari eng yaxshi murabbiy bo‘lish uchun Pep Gvardiola (“Manchester Siti”), Tomas Frank (“Brentford”) va Yurgen Klopp (“Liverpul”) kurash olib borgandi.
Eslatib o‘tamiz, mart oyida “Arsenal” ustozi Mikel Arteta eng yaxshi deb topilgandi.
“Manchester Yunayted” hujumchisi Krishtianu Ronaldu esa aprel yakunlariga ko‘ra, oyning eng yaxshi futbolchisi deb topildi. 37 yoshli hujumchi aprel oyida 4 ta o‘yinda 5 ta golga mualliflik qildi.
“Qizil iblislar” futbolchisi o‘z faoliyatida 6-marta ushbu sovringa ega chiqmoqda va bu borada Ueyn Runini (5 marta) ortda qoldirib, klub rekordini qayd etdi. Premyer Liga tarixida eng ko‘p oy futbolchisi nomiga sazovor bo‘lgan futbolchilar Harri Keyn (“Tottenhem”) va Serxio Aguero (“Manchester Siti”) hisoblanadi. Har ikkala hujumchi 7 martadan ushbu sovringa loyiq ko‘rilgan.
Ronaldudan tashqari ushbu sovrin uchun Natan Kollins (“Byornli”), Kevin de Bryuyne (“Manchester Siti”), Bruno Gimaraes (“Nyukasl”), Gabriel Jezus (“Manchester Siti”), Son Hyon Min (“Tottenhem”), Tiago Alkantara (“Liverpul”), Leandro Trossard (“Brayton”) kabi futbolchilar da’vogar edi.
Mart oyida “Tottenhem” hujumchisi Harri Keyn eng yaxshi futbolchi deb topilgandi.
Izoh (0)