Jizzaxda 21 yoshli yigitni ayollar bilan yurishini ota-onasiga aytish bilan qo‘rqitib, undan 3 mln so‘m talab qilgan shaxslar ushlandi

Jizzax viloyatida tovlamachilik yo‘li bilan pul undirmoqchi bo‘lgan shaxslar qo‘lga olindi, deya xabar qilmoqda Tergov departamenti.

Qayd etilishicha, 2022-yilning 28-aprel kuni 21 yoshli Y.J. viloyat ichki ishlar bo‘limiga ariza bilan murojaat qilib, unda oldindan tanish bo‘lgan 25 yoshli R.M. haydovchilik guvohnomasi o‘g‘irlanmagan bo‘lsa-da, “Haydovchilik guvohnomamni sheriklaring o‘g‘irlab olgan”, deb aytib, go‘yoki uni o‘g‘irlangani bo‘yicha IIBga ariza bilan murojaat qilgan.

Shu orqali ota-onasini ichki ishlar idorasiga chaqirtirib, ularni oldida sharmandasini chiqarishni, yengil tabiatli ayollar bilan bog‘liq munosabatlari, ularga pul sarflayotganligi to‘g‘risida ota-onasiga xabar qilishini ro‘kach qilib, Y.J. uchun sir saqlanishi lozim bo‘lgan shaxsiy ma’lumotlarni oshkor qilish bilan uni qo‘rqitgan.

Undan tovlamachilik yo‘li bilan 3 mln so‘m miqdoridagi pullarni berishga majbur qilayotgani uchun unga nisbatan qonuniy chora ko‘rishni so‘ragan.

Mazkur ariza yuzasidan o‘tkazilgan tezkor tadbir davomida yuqoridagi shaxs Jizzax shahar “Sayiljoyi” mahallasi hududida joylashgan Simple kafesi yaqinida arizachidan talab qilingan pullarni olgan vaqtda ashyoviy dalillar bilan qo‘lga olingan.

Mazkur holat yuzasidan Jizzax shahar IIB huzuridagi tergov bo‘limi tomonidan R.M.ga nisbatan Jinoyat kodeksning 165-moddasi 1-qismi (tovlamachilik) bilan jinoyat ishi qo‘zg‘atilgan.

Hozirda jinoyat ishi yuzasidan dastlabki tergov harakatlari olib borilmoqda.

Jinoyat kodeksining normalariga ko‘ra, ushbu turdagi jinoyatni sodir etgan shaxs 3 yildan 5 yilgacha ozodlikni cheklash yoxud 3 yildan 5 yilgacha ozodlikdan mahrum qilish bilan jazolanishi mumkin.