UEFA Chempionlar Ligasi va boshqa Yevrokuboklarning yangilangan formatini e’lon qildi

UEFA Yevrokuboklar yangi formatga o‘tkazilishini ma’lum qildi. Yangi formatda “shvetsarcha tizim”dan foydalaniladi.

Chempionlar Ligasida ishtirok etuvchi jamoalar soni 32 tadan 36 taga oshiriladi. Qo‘shimcha to‘rt yo‘llanmadan biri Yevropaning eng kuchli 5-chempionatida 3-o‘rinni qo‘lga kiritgan jamoaga tegadi. Yana biri chempionlar yo‘li saralash bosqichidan muvaffaqiyatli o‘tgan klubga nasib etadi. Qolgan ikkitasi esa o‘tgan mavsum Yevrokubklarda eng yaxshi natija qayd etgan liga jamoalariga beriladi.

Barcha jamoalar bitta jadvalga joylashtiriladi. Har bir jamoa sakkizta turli raqibga qarshi bahs olib boradi (4 ta uy, 4 ta safar o‘yini).

Dastlabki 8 ta o‘rinni egallagan jamoa avtomatik ravishda 1/8 final bosqichiga yo‘l oladi. 9—24-o‘rin egalari esa ikkita o‘yindan iborat pley-off bosqichida ishtirok etadi va undan muvafaqqiyatli o‘tgan yana 8 klub nimchorak finalga chiqadi.

Yevropa Ligasi (guruh bosqichida 8 ta o‘yin) va Konferensiyalar Ligasi (6 ta o‘yin) ham xuddi shu formatda o‘tkaziladi. Yangi format 2024/25-yilgi mavsumdan boshlab joriy etiladi.

Avvalroq UEFA Chempionlar Ligasi pley-off bosqichida to‘rt finalchi formatini joriy etmoqchi ekani xabar qilingandi.