Parij appelyatsion sudi Fransiya sobiq bosh vaziri Fransua Fiyonni to‘rt yil muddatga ozodlikdan mahrum qildi, unga bir yillik qamoq jazosi tayinlab, davlat mablag‘larini o‘zlashtirib, mansabidan foydalangan holda rafiqasi Penelopa Fiyonni ishga joylashtirgani uchun 375 ming yevro jarimaga tortdi. Bu haqda France 24 telekanali xabar qilgan.
Fiyonning rafiqasiga ikki yillik shartli qamoq va 375 ming yevro miqdorida jarima belgilandi.
Fransua Fiyon 2007 – 2012-yillarda Nikolya Sarkozi prezidentligi davrida Fransiya bosh vaziri lavozimida ishlagan. 2016-yilda u “Respublikachilar” partiyasidan nomzod sifatida ko‘rsatildi va 2017-yilda Sarkozi asoschisi bo‘lgan mazkur partiya vakili sifatida saylovlarda ishtirok etdi.
Saylovoldi kampaniyasi vaqtida Le Canard Enchaîné jurnalida chop etilgan maqola tufayli katta mojaro kuzatildi. Unda Penelopa Fiyonning 1998 – 2007-yillarda eriga va uning parlamentdagi o‘rinbosariga yordamchilik qilgani uchun 500 ming yevro maosh olgani qayd etilgan. Shuningdek ayol Revue des Deux Mondes jurnalida adabiy maslahatchi sifati 100 ming yevro olgan. Maqola mualliflari Penelopa Fiyonning mazkur lavozimlardagi ish faoliyatini tasdiqlaydigan ma’lumotlar topilmaganini va uning ishlamasdan maosh olganini taxmin qilgan. Fransiyada ushbu mojaroga Penelopegate nomi berilgan.
2017-yil mart oyida Fransiya huquq-tartibot idoralari davlat mablag‘larini talon-toroj qilgani uchun Fiyon va uning rafiqasiga nisbatan rasmiy tergov harakatlarini boshladi, tintuvlar o‘tkazdi. Er-xotin ayblovlarni inkor etdi, Fiyon jinoiy ishlar ochilgani tufayli prezidentlik saylovlarida ishtirok etmaslikka qaror qildi. Oqibatda Fransiya prezidentligi saylovlarining birinchi turida u 20 foiz ovoz olib, uchinchi bo‘ldi. Ikkinchi turga “Milliy front” yetakchisi Marin Le Pen, shuningdek “Olg‘a, respublika” harakati vakili Emmanuel Makron o‘tishdi va Makron g‘alabaga erishdi.
2020-yilda Parij sudi Fiyonni davlat mulkini talon-toroj qilganlikda, rafiqasini ishga joylab mansabini suiiste’mol qilganlikda aybli deb topdi va uni besh yil muddatga ozodlikda mahrum qilib, uch yillik shartli qamoqni muddat ichiga kiritdi. Shu bilan birga unga 375 ming yevro jarima tayinlanib, prezidentlik saylovlarida qatnashishiga 10 yillik taqiq qo‘yildi. Er-xotin ayblovni tan olmasdan, sud qarorini qayta ko‘rib chiqishni talab qilgandi.
Izoh (0)