JCh—2022 saralashi doirasida 2021-yilning 5-sentabrida bo‘lib o‘tishi rejalashtirilgan Braziliya va Argentina terma jamoalari o‘rtasidagi bahs qayta o‘tkaziladigan bo‘ldi.
Eslatib o‘tamiz, mazkur uchrashuv 4-daqiqadayoq to‘xtatilgandi. Braziliya politsiyasi maydonga chiqib kelgan va karantin qoidalarini buzgan Argentinaning to‘rt nafar futbolchisini (Buendiya, Martines, Lo Chelso va Romero) hibsga olmoqchi bo‘lgandi. Shundan keyin jamoalar saralash o‘yinlarini muvaffaqiyatli yakunlab, Qatar mundiali yo‘llanmasiga ega chiqdi.
Keyinchalik FIFA o‘yinni qayta o‘tkazish va har ikki tomonni jarimaga tortish haqida qaror qabul qilgandi.
Braziliya va Argentina futbol assotsiatsiyalari mazkur o‘yin turnir jadvaliga ta’sir o‘tkazmagani bois FIFAdan qayta o‘tkazish talabini bekor qilishni so‘radi. Biroq FIFA apellyatsiya qo‘mitasi ushbu murojaatga rad javobini berdi va o‘yinning qayta o‘tkazilishini ma’lum qildi. Shuningdek, terma jamoalarga qo‘llanilgan jarima jazo chorasi ham o‘z kuchida qoladi.
Katta ehtimol bilan mazkur o‘yin boshqa mintaqada o‘tkaziladi. O‘yinning sanasi haqida keyinroq ma’lum qilinishi aytilgan.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)