“Liverpul” hujumchisi Sadio Mane faoliyatini Bundesligada davom ettirishi mumkin.
Sky Sport Deutschland xabariga ko‘ra, 30 yoshli futbolchiga “Bavariya”dan qiziqish bor.
Myunxenliklar sport direktori Hasan Salihamidjich o‘tgan haftada Mane bilan hamkorlik qiladigan ROOF agentligi xodimlari bilan uchrashgan. Suhbat davomida senegallik futbolchining transferi haqida gap borgan. Biroq shu bilan birga klublar hali o‘zaro muzokara o‘tkazmagan.
Manega “Liverpul” Muhammad Saloh bilan yangi bitim imzolashga e’tiborini qaratib, Sadio bilan ushbu masalani paysalga solayotgani yoqmayapti. Manening klub bilan amaldagi shartnomasi 2023-yilning yozida o‘z nihoyasiga yetadi. Shu bois mersisayd jamoasi futbolchini sotib yuborishi mumkinligini inkor etib bo‘lmaydi. Salihamidjich esa bu vaziyatdan unumli foydalanmoqchi.
Shuningdek, “Bavariya”ning Serj Gnabri bilan yangi kelishuv borasida murosa qila olmagani ham ushbu transferning amalga oshish ehtimolini oshiryapti.
Mane joriy mavsum APLda 32 ta o‘yin o‘tkazib, 14 ta gol va ikkita golli uzatma muallifiga aylandi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)