Ijtimoiy tarmoqlarda Samarqand viloyati Kattaqo‘rg‘on tumani “Elmurod Qurbonov” fermerlar uyushmasi “Kiymado‘z” qishlog‘ida mudhish qotillik ro‘y bergani haqida xabarlar tarqaldi. Viloyat prokuraturasi holat yuzasidan ma’lumot berdi.
Tarqalgan xabarlarda aytilishicha, jabrlanganlar uchastka nozirini voqeadan xabardor qilib, uni yordamga chaqirgan, biroq u o‘z vaqtida yetib kelib, kelishmovchilikni bartaraf etmagan. Ta’kidlanishicha, ikki aka-uka Xatirchi shifoxonasiga olib ketilgan, biri vafot etgan va yana biri og‘ir ahvolda.
Viloyat prokuraturasiga ko‘ra, qotillik 8-may kuni tumanning “Nayman” mahallasi, “Qo‘ymaduz” qishlog‘ida sodir bo‘lgan. Sud tibbiy ekspertining ma’lumotnomasida marhum F.Q.ning tanasida, ya’ni o‘ng yelka bo‘g‘imi, o‘ng tirsak bo‘g‘imi, o‘ng tizza bo‘g‘imi sohasida hamda ko‘krak qafasi chap tomonida shilinmalari, ko‘krak qafasi orqa yuzasida sanchilib kesilgan yaralari, ko‘krak qafasi orqa yuzasi plevra bo‘shlig‘iga teshib o‘tib, ikkala o‘pkani jarohatlovchi sanchilib kesilgan yaralari bo‘lib, marhumning o‘limi ichki va tashqi qon ketishdan kelib chiqqani ko‘rsatilgan.
Mazkur holat yuzasidan Kattaqo‘rg‘on tuman prokuraturasi tomonidan tomonidan Jinoyat kodeksining 97-moddasi (qasddan odam o‘ldirish) 1-qismi bilan jinoyat ishi qo‘zg‘atilib, ikki nafar fuqarolar gumonlanuvchi sifatida jalb qilinib, dastlaki tergov harakatlari tuman prokuraturasi tomonidan olib borilmoqda.
Avvalroq Jizzaxda 45 yoshli cho‘pon mast holda ikki sherigini pichoqlab o‘ldirgani, Surxondaryoda ikki kishini o‘ldirganlikda gumonlangan shaxs “Domodedovo” aeroportida qo‘lga olingani, Toshkentdagi “Malika” savdo majmuasida sotuvchini pichoqlab o‘ldirgan yigit 10 yilga qamalgani to‘g‘risida xabar berilgandi.
Izoh (0)