Ukraina bosh vaziri o‘rinbosari, vaqtincha bosib olingan hududlar reintegratsiyasi bo‘yicha vazir Irina Vereshchuk Mariupoldagi “Azovstal” zavodidan tinch aholini evakuatsiya qilish yakunlanganini ma’lum qildi.
“Prezidentning topshirig‘i bajarildi: ‘Azovstal’dan barcha ayollar, bolalar va qariyalar evakuatsiya qilindi. Mariupol gumanitar operatsiyasining mazkur qismi yakunlandi”, — deb yozgan Vereshchuk o‘zining Telegram-kanalida.
U “Azovstal” hududida yana tinch aholi bor-yo‘qligiga aniqlik kiritmagan.
“Azovstal” — Mariupoldagi Ukraina harbiylari nazoratidagi so‘nggi joy. Aprel oyi oxirida mamlakat rasmiylari zavodda harbiylar bilan birga kamida 2000 tinch aholi vakillari borligini da’vo qilgan edi. Zelenskiy Mariupolda qolganlar o‘ldirilsa, Rossiya bilan muzokaralarga nuqta qo‘yilishini aytgan.
May oyi boshida BMT va Qizil Xoch tashkiloti ko‘magida zavoddan tinch aholini evakuatsiya qilish boshlandi (tomonlar evakuatsiya qilinganlar soni bo‘yicha turli ma’lumotlarni keltirdi). Ulardan ba’zilari Zaporojyega yetkazilgan, boshqalari esa, Rossiya Mudofaa vazirligining ta’kidlashicha, Donteskda qolishga qaror qilgan.
Izoh (0)