Jizzaxda aholi yashaydigan hududda bo‘rilar izg‘ib yurgani aytilgan xabarlarga izoh berildi

Ijtimoiy tarmoqlarda Jizzax viloyati Zomin tumanidagi aholi yashash hududlarida bo‘rilar izg‘ib yurgani haqida xabarlar tarqaldi. Viloyat Ekologiya boshqarmasi holat yuzasidan ma’lumot berdi.

Qayd etilishicha, bo‘rilar aynan Zomindagi shaharcha hududida bo‘lmagan. Jonivorlar Jizzax viloyatining tog‘li hududlarida uchraydi va yashaydi. Ammo so‘nggi yillarda bo‘rilarning aholiga tashlangani yoki shikastlantirish holatlari aniqlanmagan.

“Ijtimoiy tarmoqlarda foydalanuvchilar tomonidan bo‘riga o‘xshash bo‘lgan itlar bo‘ri ovozi bilan tasvirlangan videolavhalar joylashtirilmoqda. Ushbu lavhalar feyk xabar bo‘lib, fuqarolardan bu kabi xabarlarni tarqatib, aholini vahimaga solmaslikni so‘raymiz”, — deyiladi munosabatda.

Avvalroq Qashqadaryo viloyati Dehqonobod tumanining tog‘li hududida Qizil kitobga kiritilgan qo‘ng‘ir ayiq va uning 2 bolasi borligi xabar qilingandi. Keyinroq qo‘ng‘ir ayiq bolalaridan bir o‘ldirilgani haqida xabar tarqaldi, Ekologiya qo‘mitasi holat yuzasidan o‘rganish ishlari olib borilishini ma’lum qildi. Surishtiruv davomida ayiq bolasini o‘ldirganlikda gumonlanuvchi erkakning shaxsiga aniqlik kiritildi. U ayiq bolasini o‘lik holda topganini, terisini o‘zida saqlab kelganini bildirgan. Holat yuzasidan to‘plangan hujjatlar Ichki ishlar organiga o‘tkazilgach aniqlanishicha, Qashqadaryo tog‘larida topilgan ona ayiq va uning bolalari tirik. O‘ldirilgan ayiq holati boshqa hududda sodir bo‘lgan.