Toshkent shahridagi mahalla fuqarolar yig‘inlarining birida hokim yordamchisi lavozimida ishlovchi shaxs 35 ming dollar pora olgan vaqtida ushlandi. Bu haqda “Yoshlar” telekanalining “Yangi davr” informatsion dasturida ma’lum qilindi.
Ma’lum qilinishicha, DXXning Toshkent shahar bo‘yicha boshqarmasi tomonidan Iqtisodiy jinoyatlarga qarshi kurashish departamentining hududiy boshqarmasi bilan hamkorlikda tezkor tadbir o‘tkazilgan. Tadbir davomida Yunusobod tumandagi mahallalardan birida hokim yordamchisi bo‘lib ishlovchi mansabdor shaxs firibgarlik yo‘li bilan mahalliy tadbirkordan 35 ming dollar olgan vaqtida ushlangan. U tadbirkorda yengil tipdagi savdo do‘koni o‘rnatish uchun mahalla hududidan 50 metr kvadrat yer ajratilishi bo‘yicha tavsiya berishni va yer maydoni hujjatlarini uning nomida rasmiylashtirishni va’da qilgan.
Holat yuzasidan Jinoyat kodeksining tegishli moddalari bilan jinoyati ishi qo‘zg‘atilgan bo‘lib, tergov harakatlari olib borilmoqda.
Avvalroq Toshkent viloyatida o‘tkazilgan tezkor tadbirda Toshkent shahar Olmazor tumanida joylashgan 4 sotix yer maydonini mansabdor tanishlari orqali uning nomiga rasmiylashtirib berishni va’da qilgan hokim yordamchisi ushlangan edi.
Izoh (0)