Qashqadaryoda Toshkentga kelib chiqishi noma’lum bo‘lgan 150 kg go‘sht olib ketayotgan Cobalt to‘xtatib qolindi

Surxondaryodan Toshkentga veterinariya ma’lumotnomalarisiz mol go‘shti mahsulotlarini olib kelayotgan Cobalt avtomobili aniqlandi. Bu haqda Qashqadaryo viloyati IIB axborot xizmati xabar berdi.

Ma’lum qilinishicha, 7-may kuni soat 03:40 larda Qashqadaryo viloyati IIB JTSB Karantin bo‘linmasi xodimlari va YHXB xodimlari bilan hamkorlikda Ko‘kdala tuman hududida joylashgan “Umakay” muntazam YPX maskanida Cobalt avtomobili to‘xtatilgan. Surxandaryo—Toshkent yo‘nalishida harakatlanib kelgan denovlik fuqaro A.X. boshqaruvidagi mashina tekshirilib, uning yukxonasi ko‘zdan kechirilganda, tegishli veterinariya ma’lumotnomalarisiz, kelib chiqishi noma’lum bo‘lgan 150 kilogrammga yaqin yirik mol go‘shtlari borligi aniqlangan.

Mazkur go‘sht mahsulotlarining sifatini aniqlash maqsadida yuk Qashqadaryo viloyat oziq-ovqat mahsulotlari xavfsizligi mikrobiologiya va veterinariya-sanitariya ekspertiza loborotoriyasiga topshirilgan.

Avvalroq Jizzaxda Nexia yukxonasi va salonidan Toshkentga olib ketilayotgan 712 kg noma’lum hayvon go‘shti topilgani, Buxorodan Toshkentga 500 kg iste’molga yaroqsiz go‘sht olib ketayotgan Isuzu to‘xtatib qolingani to‘g‘risida xabar berilgandi.