Navoiyda kirakashlik bilan shug‘ullanmoqchi bo‘lgan fuqarodan tovlamachilik orqali pul talab qilgan avtoshohbekat “yetakchisi” qo‘lga olindi, deb xabar beradi Navoiy viloyati IIB axborot xizmati.
Ma’lum bo‘lishicha, konimexlik fuqaro O. sotib olgan mashinasi bilan kirakashlik qilish maqsadida qonuniy tartibda hujjatlarini rasmiylashtirib, Navoiy—Zarafshon yo‘nalishida harakatlanayotgan mashinalar avtoshohbekatidan joy oldi. Biroq ancha yillardan buyon shu yo‘nalishda yo‘lovchi tashiydigan va o‘zini “shohbekat egasi” deb hisoblagan karmanalik B. ismli shaxs holatga xayrixohlik ko‘rsatmagan. U fuqaro O.ga agarda shu bekat orqali yo‘lovchi to‘plasa, har oyda 500 ming so‘m soliq to‘lashi shartligini aytgan.
Fuqaro O. buni shunchaki hazil deb qabul qilgan, ammo vaqt o‘tib zo‘rlik bilan pullarni oladigan B. to‘g‘risida huquqni muhofaza qiluvchi organlarga xabar bergan.
Avtoshohbekat zo‘ravoni navbatdagi oylik “soliq”ni olayotgan vaqtida ushlangan. Hozirda holat yuzasidan surishtiruv harakatlari olib borilmoqda.
Avvalroq Samarqandda kirakashlardan har kuni 30 ming so‘m “o‘lpon” olib yurgan shaxslar ushlangani to‘g‘risida xabar berilgandi.
Izoh (0)