Toshkent—Shahrisabz—Toshkent yo‘nalishi bo‘yicha “Afrosiyob” poyezdlari qatnovi yo‘lga qo‘yiladi

Yo‘lovchilarga transport xizmatlar ko‘rsatish ko‘lamini yanada oshirish maqsadida 7—8-may sanasidan boshlab Toshkent—Shahrisabz—Toshkent yo‘nalishida yuqori tezlikda harakatlanuvchi “Afrosiyob” zamonaviy poyezdlari qatnovi yo‘lga qo‘yiladi. Bu haqda “O‘ztemiryo‘lyo‘lovchi” AJ matbuot xizmati xabar berdi.

Qatnovlar haftaning shanba va yakshanba kunlari amalga oshiriladi:

• Toshkent—Shahrisabz yo‘nalishida qatnaydigan 758-sonli “Afrosiyob” zamonaviy poyezdi shanba va yakshanba kunlari soat 08:00 da Toshkent markaziy vokzalidan;
• Shahrisabz—Toshkent yo‘nalishida qatnaydigan 757-sonli “Afrosiyob” zamonaviy poyezdi esa Shahrisabz temiryo‘l vokzalidan soat 15:40 da harakatini boshlaydi.

Eslatib o‘tamiz, Shavkat Mirziyoyev 26-aprel kungi videoselektor yig‘ilishida sifatli transport-logistika xizmatlari yo‘lga qo‘yilmasa, turizmni rivojlantirib bo‘lmasligini ta’kidlagandi. O‘shanda “O‘zbekiston temir yo‘llari” bir oy muddatda “Afrosiyob” tez yurar poyezdini Shahrisabzgacha harakatini qayta tiklashi belgilangandi. Mutasaddilarga 1-sentabrga qadar har kuni 2 mingdan ziyod sayyohlarga tarixiy maskanlarni aylanib chiqish imkonini beradigan 2 qavatli muntazam turistik avtobuslar qatnovini yo‘lga qo‘yishga topshiriq berilgan edi.