5-may kuni O‘zbekiston—Qirg‘iziston chegarasida qurol qo‘llash bilan bog‘liq hodisa ro‘y bergan va oqibatda uch nafar qirg‘izistonlik halok bo‘lgani to‘g‘risida xabar berilgandi. O‘zbekiston Davlat xavfsizlik xizmati Chegara qo‘shinlari holat bo‘yicha rasmiy bayonot berdi.
Ma’lum qilinishicha, 5-may kuni o‘zbek—qirg‘iz davlat chegarasining Namangan viloyati Yangiqo‘rg‘on tumani Oqtom qishlog‘i hududidan o‘tgan qismida bir guruh noma’lum shaxslar tomonidan O‘zbekistondan Qirg‘izistonga noqonuniy ravishda ko‘p miqdordagi tovar-moddiy boyliklari olib o‘tilayotgani o‘zbek chegara naryadlari tomonidan kuzatilgan va ushbu qonunbuzarlikning oldini olish bo‘yicha choralar ko‘rilgan.
Chegara naryadi tomonidan davlat chegarasi buzg‘unchilarini qo‘lga olish vaqtida qoidabuzarlarning bir guruhi harbiy xizmatchilarga nisbatan qarshilik ko‘rsatib, kuch ishlatib, tan jarohatlari yetkazgan va qurollarni olib qo‘yishga harakat qilgan.
Ushbu holatda harbiy xizmatchilar qonunchilikda belgilangan tartibda qurol qo‘llashga majbur bo‘lgan. Oqibatda 3 nafar shaxs yaralanib, ularning jinoiy sheriklari tomonidan Qirg‘iziston hududiga olib ketilgan.
Hodisa tafsilotlarini aniqlash maqsadida 5-may kuni zudlik bilan O‘zbekiston va Qirg‘izistonning hudud bo‘yicha chegara vakillari o‘rtasida uchrashuv o‘tkazilgan. Shuningdek, 6-may kuni Farg‘ona vodiysi yo‘nalishi bo‘yicha va Qirg‘izistonning Jalolobod viloyati bo‘yicha chegara vakillarining uchrashuvi bo‘lib o‘tgan.
Hozirda har ikki tomon holat bo‘yicha tekshiruvlarni davom ettirmoqda, chegarada vaziyat barqaror.
Holat yuzasidan O‘zbekistonning tegishli huquqni muhofaza qiluvchi idoralari tomonidan 6-may kuni Jinoyat kodeksining 223 moddasi (qonunga xilof ravishda chet elga chiqish yoki O‘zbekiston Respublikasiga kirish) bilan jinoyat ishi qo‘zg‘atilib, tergov harakatlari olib borilmoqda.
Eslatib o‘tamiz, aprel boshlarida Qirg‘iziston—O‘zbekiston davlat chegarasi uchastkasida qurol qo‘llash bilan bog‘liq hodisa ro‘y bergandi. O‘shanda Jalolobod viloyati Axsi tumani Deyres qishlog‘ida qirg‘izistonlik bir necha fuqaro O‘zbekiston hududiga noqonuniy ravishda yuk olib o‘tmoqchi bo‘lgan. Ular O‘zbekiston hududidagi davlat chegara chizig‘idan 500 metr uzoqlikda O‘zbekiston Davlat xavfsizlik xizmati chegara xizmati xodimlari tomonidan aniqlangan. Kontrabandachilar o‘zbek chegarachilarining to‘xtash haqidagi talablariga bo‘ysunmagan.
Qo‘shni davlat fuqarolarini hibsga olish vaqtida janjal kelib chiqqan. O‘zbekiston chegarachilari o‘z hayoti va sog‘lig‘ini saqlab qolish maqsadida qurol ishlatgan, oqibatda ikki fuqaro hayot uchun xavfli tan jarohatlari olib, halok bo‘lgan.
Izoh (0)