O‘zbekistonda yanvar—mart oylarida 68 ming 905 dona yengil avtomobil ishlab chiqarilgan. Bu haqda Davlat statistika qo‘mitasi xabar qildi.
Qayd etilishicha, yengil avtomobillar ishlab chiqarish hajmi 2021-yilning mos davri bilan solishtirilganda 24 ming 451 taga oshgan.
2022-yilning dastlabki 3 oyida O‘zbekiston Ozarbayjon, Tojikiston, Koreya va Livanga 58 dona yengil avtomobilni eksport qilgan. Bu ko‘rsatkich 2021-yilning mos davri bilan solishtirilganda 8 ming 763 taga kamaygan.
Ko‘rib chiqilayotgan davrda O‘zbekiston 21 ta xorijiy davlatlardan qiymati 189,3 million dollarga teng bo‘lgan 8 ming 508 ta yengil avtomobil import qilgan. Yengil avtomobillar importi 2021-yilning mos davri bilan solishtirilganda 5 ming 361 taga yoki 2,7 barobarga oshgan.
Eslatib o‘tamiz, Shavkat Mirziyoyev 14-fevral kuni mashinasozlik sanoati istiqbollariga bag‘ishlangan yig‘ilish o‘tkazgandi. Unda davlat rahbari avtomobillarni ko‘proq ichki bozorga yo‘naltirib, butlovchi qismlar hisobiga yillik eksportni 500 million dollarga yetkazish topshirig‘ini bergan. Shuningdek, import avtomobillar uchun bojxona bojini 2 barobarga qisqartirish, avtomobil uchun oldindan to‘lov miqdorini 85 foizdan 50 foizgacha pasaytirish vazifasi qo‘yilgan.
Avvalroq O‘zbekistonda mart oyida eng ko‘p Cobalt avtomobili ishlab chiqarilgani, 2022-yilning yanvar—mart oylarida O‘zbekiston 9 ta xorijiy davlatdan qiymati 13,5 million AQSH dollariga teng bo‘lgan 455 ta elektromobil import qilgani to‘g‘risida xabar berilgandi.
Izoh (0)