Har bir uydan topish mumkin bo‘lgan mahsulotlardan 3 ta samarali soch niqobi

Go‘zallik salonidagi qimmat mahsulotlarni uy sharoitida oddiylariga munosib ravishda almashtirish mumkin. Ularning aksariyati, albatta, oshxonangizda bo‘ladi. “Lisa.ru” nashri har bir uyda mavjud bo‘lgan mahsulotlar yordamida sochga niqob tayyorlash bo‘yicha ko‘rsatmalar taqdim etdi.

Namlash, oziqlantirish, o‘sishni rag‘batlantirish, jingalaklarni mustahkamlash yoki aksincha, tekislash — bu natijalarga erishish doimo hal qilinishi kerak bo‘lgan muammolarning kichik bir qismidir. Xohlaysizmi yoki yo‘q, lekin konditsioner hech qachon niqobning o‘rnini bosmaydi, hatto uni belgilangan uch-besh daqiqadan ko‘proq ushlab tursangiz ham. Samarali niqoblar munosib pul talab qiladi, parvarish esa doimiy ravishda kun tartibida bo‘ladigan masala. Darhaqiqat, oddiy mahsulotlardan foydalangan holda tayyorlangan niqoblar ko‘p muammolarni samarali hal qilishi mumkin.

Yog‘li sochlar uchun suli niqobi

Suli yormasi bosh terisi teshiklarini samarali tozalaydi, soch o‘sishiga yordam beradi, kepakni ketkazadi va qichishishni to‘xtatadi. Ushbu oddiy mahsulotdan foydalangan holda soch niqoblari ham gullash va shikastlangan sochlarning oldini olishga yordam beradi. Bunday tabiiy suli niqobi bilan sochlarni parvarish qilishdan osonrog‘i yo‘q.

Retsept:

• sut — 1/8 chashka
• bodom yog‘i — 1 choy qoshiq 
• suli — 1/4 chashka

Mahsulotlarni blenderga solib, xamir hosil bo‘lguncha aralashtiriladi. Aralashmaning foydali elementlarni tabiiy ravishda chiqarishi uchun u bosh terisi va sochlarga 15-30 daqiqa davomida qo‘llanadi. Sochni iliq suv bilan yuvib, ta’riflab bo‘lmaydigan mayinlik va poklikni his qilish mumkin.

Soch uchun avokadoli niqob

Avokadoni qadrlash uchun yana bir sabab qo‘shildi, uning foydali xususiyatlari va mazasidagi keng imkoniyatlardan tashqari, albatta. Tabiiy yog‘lar va yog‘ kislotalari manbai sifatida avokadodan foydalanadigan juda oddiy niqob sochlarni ildizdan uchigacha oziqlantirishga yordam beradi. Shuningdek, u normal soch o‘sishi uchun zarur bo‘lgan juda ko‘p biotinni o‘z ichiga oladi.

Retsept:

• avokado — 1 dona;
• yogurt — 1 stakan;
• zaytun yog‘i — 2 osh qoshiq.

Meva bo‘laklar qolmaguncha maydalanadi, so‘ngra yogurt va yog‘ qo‘shib, niqob hosil qilinadi. Aralashma soch va bosh terisiga qo‘llanadi va eng yaxshi natijaga erishish uchun 30 daqiqaga qoldiriladi. Jarayon tugagach, niqob qoldiqlarini olib tashlash uchun sochlarni shampun va konditsioner bilan yuvish mumkin.

Yumshoq va porloq sochlar uchun kokos moyi niqobi

Kokos yog‘idan foydalanish shikastlangan sochlar, ayniqsa quruq va jingalak bo‘lsa, qutqaruvchi hisoblanadi. Bu yog‘ tabiiy tekislovchi bo‘lib, soch va bosh terisini shikastlanishdan samarali himoya qiladi. Terini oziqlantirib, sinishini kamaytiradigan yog‘ tabiiy ravishda soch to‘kilishiga qarshi kurashadi, ularni yumshoq va porloq qiladi. Agar kutilayotgan natijalardan hayratda qolishni istasangiz, unda faqat uchta mahsulot kerak bo‘ladi.

Retsept:

• kokos moyi — 2 osh qoshiq;
• asal — 2 osh qoshiq;
• olma sirkasi — 1 osh qoshiq.

Kokos yog‘i va asalni mikroto‘lqinli pechda bir xil idishda eritib olinadi. Sirka qo‘shib, aralashtiriladi. Aralashma sovigach, sochlarga qo‘llanadi va 20 daqiqaga qoldiriladi. Niqobni qo‘llashdan oldin sochni namlashning hojati yo‘q. Niqobni olib tashlash uchun sochlarni shampun bilan yuvish kifoya.